Mitaartoq attaveqatigiittarfinni oqallitsitsingaatsiartoq

Ilulissani mitaartoq qimmiaqqanik toqungasunik ujamilik Facebookikkut ulluni kingullerni sakkortuumik oqallitsitsivoq.

Tamanna pivoq mitaartup assiga inuit qarasaasiakkut attaveqatigiittarfiatigut innertut sukkatigaluni siammarterneqareersorlu.

- Tupigusuppunga qimminut taama ataqqinninngitsigisoqarsinnaammat, qimmiaqqanik toqunikunik mitaarutilinnut akerliusut ilaat Facebookimi taama allappoq.

Facebookimik atuisartup allap asseq politiinut tunniuppaa.

Politiit KNR-imut uppernarsarpaat tunniussisoqarsimasoq, politiilli suliamik aallartitsinngillat.

- Inatsisinik unioqqutitsisoqarsimasinnaanera ilimatsaatinngilarput. Taamaammat suliamik aallartitsinissamut tunngavissaqanngilagut, Kalaallit Nunaanni Politiini tusagassiisartoq, Camilla Palmann, taama nassuiaavoq.

Ilisimasalik: Ileqqutoqaavoq

Kisianni mitaartup qimmiaqqanik toqunikunik mitaaruteqarnera ileqqutoqaavoq, taama ilisimasalik oqarpoq.

- Tassa qangaanerusoq atorneqarnikuuvoq. Nutaajunngilaq, Hans Lange, nunatta 1200-kkut aallartinneranit maannamut oqaluttuassartaanik ilisimatusarsimasoq, taama oqarpoq.

Hans Langep nassuiaanera naapertorlugu mitaartarneq ileqqutoqaavoq kaperlareerluni silap qaammariartulernerani, soorlu Kunngit Pingasut ulluisa nalaanni - ingerlanneqartartoq.

- Ersinarnerpaamik atisalersorlutik inuit qimaatinniarlugit nuannaartillugillu pisaramikkit, taanna taama oqarpoq.

Kisianni tupassimasunit Facebookimi suli oqallittoqartuarsinnarpoq. Ingasammik nunatta kujasinnerusortaanit.

- Avannaani qimminut ekspertiunngilluinnarpunga, aamma paasinngisaannartussaavara uumasoq atortutut isigiinnarneqarsinnaanera, kisianni uumasoq suungaluarpat isumaqarluinnarpunga ataqqineqartariaqartoq, mitaartut qimmiaqqanik mitaaruteqarneranut isornartorsiuisut ilaat taama allappoq.

AAMMA ATUARUK Mitaartoq qimmiaqqanik ujamilik: Naggataatigut eqqaaviup iluanut toqqorpunga

Borgmesteriusimasup ileqqutoqqat illersorai

Ilulissat Kommunerisimasaani aamma Qaasuitsup Kommunerisimasaani borgmesteriusimasoq, Ole Dorph, isornartorsiuisunut eqqissisaavoq.

- Massakkut mitaartarneq pillugu oqallinnermi aammalu allaqattaartuni malunnarpoq soorlulusooq qimmiaraq inoorlaaq toqussinnarlugu, toqorlaaq ujamiliussinnarlugu, mitaarluni atorneqartoq. Kisianni taamaanngilluinnarpoq, Ole Dorph oqarpoq.

- Mitaartarneq maani Ilulissani kulturitut oqaatigisinnaavarput. Aamma akuleruffiginiarneqarnera tulluartutut isiginngilara. Uagut maani pissusitoqqagut pissuserissuagut, taava allat qanoq iliorniarunik qanoq iliorniarlik. Taanna uagut susassarinngilarput, Ole Dorph oqarpoq.

- Qimmiaqqat atorneqarsinnaasarput toqunikut. Immaqa inuuniarnerminni toqunikut imaluunniit anaanaminnginnaanniit nanerneqarlutik toqusimasut. Qerisut.

Aliikkusersuinissaq siunertaavoq

Mitaartutummi qanoq pikisoqarnissaanut malittarisassaqanngilaq. Tamanna inuit nammineq aalajangertaraat, Hans Lange, Thulekulturi pillugu immikkut ilisimasalik aamma Nunatta Katersugaasiviani pisortaq, taama oqarpoq.

- Soorunami pissutsit allanngornikuupput. Ullumikkut aamma uumasunut isiginneriaaseq aamma allanngornikuuvoq, Nunatta Katersugaasiaviani pisortaq, taama oqarpoq.

- Inuit nammineq aalajangertarpaat qanoq atisalersussanerlutik. Suut atussanerlugit aamma suut ersisaarutigissanerlugit namminneq aalajangertarpaat.

Isornartorsiuisut apersornissaat iluatsinngilaq - taamaammat Facebookimi oqallinnermit KNR issuaaginnarniarluni aalajangerpoq.