Iluliarmiu Jens Peter K. Rosbach qimmiaqqanik toqunikunik sisamanik ujamilerluni ukiut marluk matuma siorna mitaartoq illoqarfimmiunik quilertatitsingaatsiarpoq. Asseq nammineq pigisaq.Assi: Privat

Mitaartoq qimmiaqqanik ujamilik: Naggataatigut eqqaaviup iluanut toqqorpunga

Ilulissani qimmiaqqanik toqunikunik sisamanik ujamilerluni ukiut marluk matuma siorna mitaartoq illoqarfimmiunik quilertatitsingaatsiarpoq.

Biilit aportut. Inuit ussallutik malersuinerisa saniatigut biilit kinguleriiaarpassuit aamma takunnikkusullutik malinnittut.

Tamanna qimmiaqqanik toqungasunik sisamanik ujamilerluni Ilulissani ukiut marluk matuma siorna mitaartup misigivaa.

Mitaartoq / mitaartut pillugit nassuiaat

  • Upperisarsiorneq nunatsinnut eqqunneqanngikkallarmalli kalaallit mitaartarput.
  • Qanoq pikisoqarnissaanut malittarisassaqanngilaq.
  • Mitaarnermi aliikkusersuinissaq ersisaarinissarlu siunertaavoq.
  • Mitaartarneq ileqqutoqaavoq kaperlareerluni silap qaammariartulernerani, soorlu Kunngit Pingasut ulluisa nalaanni ingerlanneqartartoq.

Tusarfik: Hans Lange.

Qimmiaqqallu toqungasut mitaarutigineqartarnerat Facebookimi ulluni kingullerni sakkortungaatsiartumik oqallisaavoq.

Tamanna pivoq Ilulissani mitaartumik qimmiaqqanik toqungasunik ujamilimmik assilisaq alla siammarterneqareersorlu.

- Tupigusuppunga qimminut taama ataqqinninngitsigisoqarsinnaammat, taama ilaatigut qimmiaqqanik toqunikunik mitaarnermi atugaqartunut Facebookimi isorinnittoqarpoq. Facebookimillu atuisoq alla asseq takoreerlugu politiinut tunniussivoq.

Qimmiaqqat toqunikut mitaarnermi atorneqarsimaneri pillugu Kalaallit Nunaanni Politiinut nalunaarutiginnittoqarsimasoq politiit uppernarsarpaat:

AAMMA ATUARUK Mitaartoq attaveqatigiittarfinni oqallitsitsingaatsiartoq

- Inatsisinik unioqqutitsisoqarsimasinnaanera ilimatsaatinngilarput. Taamaammat suliamik aallartitsinissamut tunngavissaqanngilagut, Kalaallit Nunaanni Politiini tusagassiisartoq, Camilla Palmann, taama nassuiaavoq.

Piffissarli ukiunik marlunnik uterteqqeriartigu. Aamma Ilulissanut, tamaanimi mitaartarneq ukiortaap kunngit pingasullu ulluata akornanni ileqquuvoq.

- Ilaquttatsinni pulaarluta ilaqutara oqariasaarami; kinatoruna mitaarli? Taavalu oqarluni qimmiaraateqarnerarluni piaqqanik sisamanik toqunikunik.

Taama Jens Peter K. Rosbachip Ilulissani unnummi ataatsimi quilertatitsinini oqaluttuaralugu aallartippoq.

- Taava sapiiserlunga taakkua atorlugit Ilulissani mitaarnikuuvunga, nangilluni taama oqaluttuarpoq.

- Taamanikkut inuit assorujuk malinnaangamik. Taavalu aamma biilerparujuit tunuleriaat ikattut malinnaallutik. Taava inuit assorujuk ussallutik malinnaaffigigaminnga. Uanga nammineerlunga takunngilakka, kisianni inuit oqaluttuarrapput biilinik aportoqarsimasoq, Jens Peter K. Rocbach oqaluttuarpoq.

Kisianni qimmiaqqanik toqunikunik mitaaruteqarluni siullerpaamik aatsaat mitaartoqanngilaq.

- Siornatigut tassa takunikuuara avannaaniugunartoq Tunumiunngikkuni facebookikkukkut assini takunikuungakku taamatut mitaartut. Assut amiilaarinikuuakka imaallunga; qanorli aamma nammineerluni misilillugit, Jens Peter K. Rosbach oqaluttuarpoq.

Jens Peter K. Rosbachillu qimmiaqqanik sisamanik ujamilerluni mitaarnera takunnittut ussatilernerannik kinguneqarpoq. Inuimmi aqqusinermi naapitaasa paaserusulerpaat illumut sorlermut isissanersoq, taamaalillutik kinaanera naatsorsinnaaniassangamikku. Taamaalillunilu unnuk taanna nammineq malersorneqartunngorpoq:

- Taava naggataatigut taakkununnga ilaquttannut apuussinnaajunnaapajaarlunga eqqaavimmut pulaannapajunnikuuvunga. Sivisulaartorujummillu eqqaaviup iluaniipput inuit peernissaasa tungaanut, Jens Peter K. Rosback taama mitaarsimalikkeersarpoq.

Mitaartut nalinginnaasumik kinaassutsititik ilisaritinneq ajorpaat.

Jens Peter K. Rosbachillu KNR-imut oqaluttuaraa qimmiaqqanik toqungasunik sisamanik ujamilerluni mitaartup kinaassusaanik inuit paasinnikkusuppallaaqimmata mitaarsimanerminik Facebookikkut nammineq nassuiinnarsimalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat