Nicemi saassussisutut pasineqartoq Europamut septembarimi tikissimasoq

Frankrigip kujataani illoqarfimmi Nicemi oqaluffimmi savimmut saassussilluni inunnik pingasunik toqutsisimasutut pasineqartoq, umiarsuarmut qimaasunik angallassissummut ilaalluni Europamut qaammat ataaseq matuma siorna tikippoq.

Franskit peqqarniisaarnianik akiuiniartut unnerluussisuat, Jean-Francoies Ricard, tusagassiortunik sisamanngornermi katersortitsinermi taama ilisimatitsivoq.

21-nik ukiulik toqutsisutut pasineqartoq Brahim Aouissaoui Tunisiamit nunasiartortuusoq, franksit tunisiamiullu politiivi ilisimatitsipput.

AAMMA ATUARUK Inuit pingasut Nicemi savimmik saassussisoqarnerani toqutaasut

Taanna Frankrigimut oktobarip ulluisa qulingiluaanni tikinnginnermini umiarsuarmik qimaasunik angallassissummut ilaalluni Tunisiamit Italiami qeqertaq Lampedusa aqqusaarlugu Europamut septemberip ulluisa 20-anni tikittoq, Ricard oqarpoq.

Taassuma saassussinermini Nicemi oqaluffimmi sulisoq 55-inik ukiulik, arnaq 60-inik ukiulik arnarlu alla 44-nik ukiulik savimmik kapillugit toquppai.

Politiit saassussiffiusumut saassussisoqarneraniit minutsit 30-t qaangiummata anngukkamik, angut saassussisutut pasineqartoq "Allahu Akbar"-imik tassa "Allahu illernarnerpaavoq"-mik nilliasaqattaartoq ikilerlugu aallaavaat.

Angut taanna inuunerminik maanna navianartorsiortoq tamatuma kingorna napparsimmavimmukaanneqarpoq.