Inuit pingasut Nicemi savimmik saassussisoqarnerani toqutaasut
Frankrigip kujataani illoqarfimmi Nicemi oqaluffissuup Notre-Damep qanittuani savimmik saassussisoqarnerani inuit pingasut toqutaasimasut qassiillu ikilerneqarsimasut politiit sisamanngornermi ullaap-tungaani uppernarsarpaat.
Toqutaasunit ataaseq oqaluffimmik paarsisuuvoq. Marlullu toqutaasut allat oqaluffiup iluani nassaarineqartut nalunaarutigineqarpoq. Arnat marluk angullu ataaseq toqutaapput.
Franskit præsidentiat, Emmanuel Macron Nicemukartoq præsidentip allaffeqarfiata paasissutissiissutigaa.
Nicemi borgmesterip, Christian Estrosip saassussineq peqqarniisaarniatut isigalugu saassussinerup kingunitsianngua Twitterikkut allappoq. Islamisiortut peqqarniisaarniarnerat.
Taamaammat unnerluussisussaatitaasuni peqqarniisaarniartoqartarneranik immikkut suliaqartut suliaq tiguaat.
Minutsimi nipaarusimaneq
Pinerluuteqartoq pinerluuteqarnermi kinguneratigut politiinit aallaaneqarlunilu ikilerneqartoq, Estrosi paasissutissiissoq, nutaarsiassaqartitsivik dpa allappoq.
- Iliuuseqarnermi siunertaanik qularutissaqartitsinngilaq.
- Nakorsarneqarnermini ”Allahu Akbar” (Guuti anneruvoq) saatsinni suaartaatigiinnaavippaa, Estrosi oqarpoq.
Franskit inatsisartuini politikerit minutsimi ataatsimi nipaarusimapput.
AAMMA ATUARUK Parisimi savilersortoqarsimanera peqqarniisaarniarnertut misissorneqartoq
Saassussineq peqqarniisaarniartoqarneratut uppernarsarneqassaguni taava Frankrigimi oqartussat peqqarniisaariniartoqarneratut isigisaasa ukiaq manna pingajorissavaat.
Tusagassiortut marluk quisaarutiginninnermi atuagassiortartut Charlie Hebdop aaqqissuisoqarfigisimasaata eqqaani septembarimi saassunneqarlutik ikilingaatsiarneqarput.
Frankrigimik ilaginnikkumajunnaarneq
Ilinniartitsisoq, Samuel Paty Parisip avataatungaani niaquerneqarpoq. Peqqarniisaarniartoq tjejeniamiuuvoq Islamimik upperisaqartoq. Taanna politiinit aallaaneqarluni toqunneqarpoq.
Ilinniartitsoq killiligaanani oqaaseqarsinnaatitaaneq pillugu ilinniartitsisimavoq Taassumalu profetip Muhammedip quiasaarutigalugu titartarneqarnera atuartunut takunnikkusuttunut takutissinnaanerarsimavaa.
AAMMA ATUARUK Atuartup angajoqqaavi naammagittaalliormata franskit politiiivit tigummigallanngortinneqarput
Titartakkat Charlie Hebdop tamanut saqqummiutarinikuuai. Atuagassiortartoq islamisiortunit 2015-imi aamma saassunneqarpoq. Tassani atuagassiorfimmi sulisut aqqaneq-marluk toqutaapput.
Ilinniartitsisup, Samuel Patyp toqutaanerata kingorna Frankrig araberit nunaannit pingaartumik Tyrkiamit ilaginnikkumajunnaarfiuvoq.
Tamanna præsidentip, Emmanuel Macronip ingasattajaartumik islamisiortut mattunniarlugit nunallu soorlu Saudi-Arabia Tyrkialu imaminik tassa muslimit palasiinik Frankrigimut muslimit oqaluffiinut angalasitsinissaat inerteqqutigilerniarlugu neriorsuuteqarneranut qisuariarneruvoq.