Muslimit qinusarfiinut saassussisimasutut pasisaq pisuunerartoq

Australiamiu Brenton Tarrant, New Zealandimi Christchurchimi muslimit qinusarfiinut marlunnut siorna saassussisutut pasisaq, unnerluutigineqartunut tamanut maanna pisuunerarpoq.

Christchurchimi sisamanngornermi ullaakkut eqqartuussinermi taama oqartoq, aviisip The New Zealand Heraldip allaaseraa.

Inuit 51-it saassussinerni toqutaasut

29-nik ukiulik Tarrant muslimit qinusarfiinut marlunnut siorna marsip ulluisa 15-ianni saassussisutut maannamut pisuunnginnerarpoq. Inuit 51-it saassussinerni toqutaapput.

Talerperliuniaq ingasaassiniaq inunnik 51-inik toqutsisimasutut inunnillu allanik 40-nik toqutseriartutut unnerluutigineqarpoq. Tamatuma saniatigut New Zealandip peqqarniisaarniarneq pillugu inatsisaanik unioqqutitsisutut unnerluutigineqarpoq.

Taamaaliornermut eqqartuussaanermi pisuutinneqarneq inuunerup sinnerani parnaarussassanngortitaanermik kinguneqartartoq, nutaarsiassaqartitsivik AP allappoq.