Pipaluk: Misigissutsikka filminngortippakka
- Filmi suliarivara asaninnerup annernartoqarsinnaanera nuannersuusinnaaneralu takutinniarsaralugit, taakkulu marluk akuleriissillugit, Pipaluk K. Jørgensen taama oqarpoq.
Taassuma filmi Anori allallugu aallartikkamiuk nammineq misigissutsikkut ilungersunartorsiorfimmiippoq.
AAMMA ATUARUK Nuuk International Film Festival aallartittoq
Taamaalilluni ilaatigut misigissutsit taamani atukkani aallaavigalugit filmiliorpoq.
- Aamma asanerpaasamik pisinnaanngisamik annaasaqarneq annernartuuvoq. Tamannali qanoq anigorniassaviuk, uangalu nammineq aqqusaarsimasama oqaluttuarerusunnginnera filmip tassunga saatsinneranut pissutaavoq, soorlu ilunni pigisara atorlugu eqqumiitsuliornikkut takusassiaralugu, Pipaluk K. Jørgensen taama oqarpoq.
AAMMA ATUARUK Filmfestivalertoqarnissaanut pilersaarutit saqqummiunneqarput
Filmimi angutini inuttatut pingaarneq tassaavoq, Angunnguaq Larsen, Inuk inuttaaffigalugu. Taassuma oqaluttuaraa, aapparinngisaminut filmiliornerminni asannittuusaartarnera killissamik qaangiiffiusarsimasoq. Tamannali avaqqunneqarsinnaanngitsoq taanna oqarpoq.
- Misigisimavunga tassa killissakka qaanersimallugit, angerlamut pisuttariaqarsimavunga uanganngoqqinniarlunga, taamatut oqarsinnaagaanni. Kisianni filmiliornermi kilissagut qaangertariaqartarpagut filmip isikkua taavalu oqaluttuap ajunnginnerpaamik oqaluttuarinissaa anguniarlugu, Angunnguaq Larsen taama oqarpoq.
