Avannaata Qimussersuanngortoq: Misigisaq nuanneqaaq
Avannaata Qimussersua naammassimmat siulliit marluk Ilulissaneersuupput Milan Mathæussen aamma Kaali Lund Mathæussen siulliummata.
Jonas Kristensen Upernaviup eqqaani Innaarsunneersut ingerlaarnerup ilarujussua siuaqqagaluarpoq.
Milan Mathæussen sekundinik arlaqanngitsunik tullersortiminit siulliulluni apuuppoq.
- Pissanganartorujuuvoq. Utimut ingerlaarnitsinni siuttunngorpunga, Milan Mathæussen KNR-mut oqaluttuarpoq.
Jonas Kristensen Innaarsunneersoq oqaluttuarpoq arfineq aappaattut inissisimagaluarsinnarluni allat ajutuullattaalermata siullernut angummakkiartorsimalluni.
- Kaajallaguffissap qanillinerani siuaraluarpunga. Kisianni najunngilara qimussillaqqissorsuit tununniit malikkaannga qimmiilu uanga qimminniit nukittunerunnguatsiaramik, Jonas Kristensen oqarpoq.
Naligeeqaat
Kaali Lund Mathæussen ingerlaarnerup ilaa aamma siuaqqatsiarpoq.
- Assorujuk pissanganarpoq apuukkiartoratta immitsinnut qanittuararsuugatta. Pikkunaraluaqisoq ilakka nakkutiginiarnermut apuunneq misigerpianngitsoorpara misigisaq imaannaanngikkaluaqisoq, Kaali Lund Mathæussen oqarpoq.
Sukkaniuteqataasut akornanni qimmerinnerpaamik toqqaasoqarmat Sisimiuneersoq Marius Inûsugtok’ qimmerinnersatut toqqagaavoq.
Aappaagu sukkaniunnissarsuaq tassaassaaq Avannaata Qimussersui tassanilu avanersuarmiut tunumiullu peqataasinnaapput.
