MIPI atorunnaassaaq
Meeqqat inuusuttullu atugaasa naalakkersuinikkut immikkut sammineqarnerinut atatillugu MIPI ukiuni kingullerni pingaarutilimmik inissisimavoq. Tassami uppernarsaatissanik suliaqartarnermikkut meeqqat inuusuttullu atugaasa naalakkersuinikkut pitsanngorsarniarneqarnerinut isummersuilluartarami.
MIPI maanna atorunnaartussanngorpoq, tassanilu sulisut meeqqat pisinnaatitaaffiinik sullissivimmut nutaamut, tassa Meeqqat Illersuisuata aamma Meeqqat Pillugit Siunnersuisoqatigiit allattoqarfiannut nuussapput.
Meeqqat Illersuisuat aamma Meeqqat Pillugit Siunnersuisoqatigiit pillugit Inatsisartut inatsisaat 2011-mi ukiakkut ataatsimiinnermi akuersissutigineqarput, aqagumiillu marsip aallaqqaataanit atuutilissallutik.
Meeqqat pisinnaatitaaffiinik sullissivik nutaajusoq, 2012-imi upernaakkut tamakkiisumik pilersinneqareersimassasoq naatsorsuutigineqarpoq.
MIPIp ilisimasanik katersuivittut sulinera Meeqqat Illersuisuata ataani ingerlaqqissaaq. Ilutigalugulu ilisimasanik katersuivittut sulinerup Meeqqat Illersuisuata ataaniittussaq politikkikkut pituttorsimannginnerulissaaq, kiffaanngissuseqarnerulluni meeqqanut inuusuttunullu tunngatillugu nutaamik ilisimasassanik ineriartortitsisinnaalissaaq.
Ilisimasanik katersuinermik suliaqarfiup suliassaa pingaaruteqartoq tassa Naalagaaffiit Peqatigiit Meeqqat pillugit Isumaqatigiissutaani allassimasunik malinninnissaq sulianillu ingerlanneqareersunik ikorfartorneqarnissaa naatsorsuutigineqarluni, tamannalu pisinnaavoq UNICEF-imik NAKUUSA-millu suleqateqarnikkut.
Sulinermi ilaatigut pisariaqassaaq meeqqat inuusuttut namminneq inuunerminni atukkatik misigisatillu aallaavigalugit oqariartuutaasa meeqqat inuusuttullu atugaasigut ilisimasanik ineriartortitsinermillu nutaanik katersinermi ataqatigiissinneqarnissaat.
