Kommuni: MIO-p nalunaarutigisai suliarineqarput
MIO Qeqqata Kommuniani angalareerluni meeqqanut suliassat 49-t kommunimut nalunaarutigai.
Taakkunannga 13-it kommunimit ilisimaneqanngillat.
Suliassat Sisimiuni, Maniitsumi nunaqarfinnilu agguataarsimapput. Suliassat nutaat pillugit Sisimiuni Maniitsumilu isumaginninnermi allaffinni angajoqqaanik oqaloqatiginninnerit aallartinneqareerput ilaqutariinnullu sullissivinni suliarinnittoqalereerluni.
AAMMA ATUARUK MIO-p tikeraarnera Qeqqata Kommunianut 49-nik nalunaaruteqartitsisoq
Kisianni naak suliaareersut saniatigut nutaanik suliassaqalerneq unammillernartuugaluartoq, kommunip suliassaq naammassisinnaagaa, kommunip ilaqutariinnermut ataatsimiititaliaani siulittaasoq, Hans Frederik Olsen, oqarpoq:
- Maniitsumi aamma Sisimiuni suliat arlaqartut ilisimaneqareermata, nalunaarutiginninnernik nutaanik, suliani ilisimaneqanngitsunik, aallartitsinissaq mersernartutut isiginngilarput. Nalunaarutiginninnerit, soorunami unammillernartoqartut, aallartereersut suliarinerat ingerlapput, Hans Frederik Olsen oqarpoq.
Qeqqata Kommuniata isumaginninnermik suliassanik suliarinninnera isornartorsiorneqartareerpoq. Namminersorlutik Oqartussat Nakkutilliinermik ingerlatsiviata kommunip isumaginninnermi sulianik ingerlatsinera naammaginanngitsutut ukioq manna februaarimi taavaa.
AAMMA ATUARUK Sisimiuni meeqqanik inuusuttunillu sullissineq isornartorsiorneqartoq
Hans Frederik Olsenillu nassuerutigaa suliat meeqqanut tungasut ataatsimut isigalugu pitsaanerusinnaasut.
- Meeqqat ikiortariallit taama amerlatigitillugit soorunami naammaginanngisaannassaaq. Pitsaanerusinnaaneralu ujartortuaannassallutigu, Qeqqata Kommuniani ilaqutariinnermut isumaginninnermullu ataatsimiititaliap siulittaasua, Hans Frederik Olsen oqarpoq.
Meeqqat pillugit inatsisip nutaap atuutilerneratigut kommunip isumaginninnermi siunnersortinik Sisimiuni marlunnik Maniitsumilu marlunnik atorfinitsitsiniarnissaa pisinnaalerpoq.
Isumaginninnermi siunnersortinik qaavatigut tallimanik 2018-imi atorfinitsitsissalluni kommunalbestyrelsi aamma aalajangersimavoq.
AAMMA ATUARUK MIO-p nalunaarusiaa nikallornartortaqarpoq
