Mette Frederiksenip aningaasat maanna illersornissamut isumaqatigiissummit immikkoortinniarpai. Taamaammat aningaasat Illersornissamut atorneqartussat ”nutaanngillat”, illersornissamullu isumaqatigiissutaareersumi aningaasat allamit nikisinneqarlutik.Assi: Scanpix

Ministeriunerup 1,5 milliardit koruunit Issittumi nakkutilliinermut atorniarai

Ministeriunerup, Mette Frederiksenip USA-p præsidentia, Trump Natop Londonimi ataatsimeersuarnerani naapissavai. Ministeriunerup Issittumi nakkutilliinissamut raadarit, qaammataasat timmisartullu siunnersuutigai.

Danskit ministeriunerat, Mette Frederiksen (Soc) Londomi Nato-p ataatsimeersuarneranut ullumi peqataajartorpoq. Taassuma amerikamiut præsidentiat, Donald Trump ataatsimeeqatigissavai, ministeriunerlu pilersaaruteqarpoq: Taassuma 1,5 milliardit koruunit Issittumi nakkutilliinermut atorniarpai.

Berlingske taama allaaserisaqarpoq.

Mette Frederiksenip aningaasat maanna illersornissamut isumaqatigiissummit immikkoortinniarpai. Taamaammat aningaasat Illersornissamut atorneqartussat ”nutaanngillat”, illersornissamullu isumaqatigiissutaareersumi aningaasat allamit nikisinneqarlutik.

AAMMA ATUARUK Danmarkip sorsuutinik arlalinnik pisinissaanik USA-p kaammattoraa

- Russit Issittumiinnerat annertusingaatsiartoq takuarput. Taamaammat umiarsuit aqqartartut annertussusaat qajannaannerusut pigisariaqarpagut. Taanna siulliuvoq. Aappaattut, russit silaannarmi suliaqarnerat aamma annertusisoq takuarput, taamaammat silaannarmi suliaqarnerput immikkut ittuusariaqarpoq. Raadarit, qaammataasat timmisartullu silaannarmi nakkutilliinissamut periarfissaapput, Mette Frederiksen Berlingskemut oqarpoq.

Ministeriunerup pilersaarutit Natomi ataatsimeersuarnermi saqqummiutereerpagit ataatsimiititaliamik taakkuninnga timitaliisussamik pilersitsisoqassaaq.

Kielsenip ataatsimeeqatiginissaa taamaatiinnaraa

Taamaalilluni ministeriunerup amerikamiullu præsidentiata akornanni ataatsimiinnissami nunarput Issittorlu pingaarnertut oqallisaaqqilerpoq. Imaluunniit oqaatigigaanni: Mette Frederiksenip Trump kingullermik naapinniaramiuk Naalakkersuisut siulittaasuata, Kim Kielsenip peqataanissaa pilersaarutaagaluarpoq. Tamanna Københavnimi septembarip ulluisa aappaanni pingajuannilu pisussaagaluarpoq, tamatumali pinissaanut sapaatit akunneri marluinnanngortut taamaatiinnarneqarpoq.

Trumpimmi nunarput pisiarerusullugu oqaatigaa – kissaateqarnerani tamanna Mette Frederiksenip Kim Kielsenillu itigartitsissutigingaatsiarpaat.

Mette Frederiksenip pisinissamik oqallinneq ”isumaqanngilluinnartuunerarpaa” – Trumpillu Kielsenip Frederiksenillu naapinnissaat tamatuma kingorna taamaatiinnarpaa, ministerillu oqaasia ”ajuissuunerarlugu”.

AAMMA ATUARUK Trumpip Nunatta tunineqarnissaata itigartitsissutigineqareerneratigut tikeraarnissani kinguartikkaa

Pisup kingorna attaveqatigiinneq aaqqinniarneqarpoq. USA-p Danmarkillu nunanut allanut tunngasunut ministeriisa naapinnerata nalaanni Trump Mette Frederiksenilu oqarasuaatikkut septembarip naanerani oqaloqatigiipput. Oqaloqatigeereeramillu amerikamiut præsidentiata Mette Frederiksen ”arnatsialaanerarpaa”.

Taamaakkaluartorli Mette Frederiksenip Trumpimit ruusamik nunarsuarmi anginerpaamik ullumi tunineqarnissani naatsorsuutigissagunanngilaa. Danmarkimi Trumpip piffissami sivisuumi noqqaassutigisaanut tassa naalagaaffimmi tunisat nalingisa 2 procentiinit (BNP) suli tapiissuteqartanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat