Danmarkip sorsuutinik arlalinnik pisinissaanik USA-p kaammattoraa

Danmarkip timmisartunik sorsuutinik, F-35-nik amerlanerusunik pisinissaanik USA-p kaammattoraa, amerikamiut Danmarkimi aallartitaat, Carla Sands Jyllands-Postenimut oqarpoq.

Taanna isumaqarpoq, danskit timmisartuutissai F-35-t nutaat 27-t saniatigut ikinnerpaamik tallimat aalajangersimasumik USA-miitinneqassasut.

- Danskit timmisartortartui Arizonami sungiusartinneqarniassammata, danskit timmisartuutaasa ilai USA-miitinneqassapput, timmisartullu 22-t missaat Danmarkimiitinneqassallutik.

- Timmisartut F-16-it massakkut 38-t 40-llu missaanniipput, timmisartullu pineqartut amerlagisassanngillat tassami ikileriarput, taamaattumik tamanna Danmarkip misissortariaqarpaa, Carla Sands Jyllands-Postenimut oqarpoq.

Illersornissamut ministereqarfiup nittartagaa naapertorlugu, Danmarki timmisartunik sorsuutinik F-16-inik taamaallaat 30-nik atorsinnaasunik peqarpoq, tassa 38-nik 40-nilluunnit peqarani, Carla Sands oqarpoq.

Nunat killiit illersoqatigiiffiata, NATO-p Londonimi ataatsimeersuarnissaa ulluni qulingiluani sioqqullugu taamatut kaammattuuteqartoqarpoq.

Carla Sandsillu tikkuarpaa, timmisartut sorsuutit amerlanerunissaat Nato-p piumasarisimagaa.

Aallartitaq aamma isumaqarpoq, issittumi nakkutiginninnerulernissamut illersornissamullu Danmarkip ukiut pingasut matuma siorna neriorsuutini eqquutsittariaqaraa.

Illersornissamut ministereqarfiup suliassaqarfii pillugit nalunaarusiarisimasaa, Issittoq 2016, Sandsip matumani innersuussutigaa.

Nalunaarusiaq naapertorlugu issittumi nakkutiginninneq ima ajortigaaq, allaat issittumi russit sakkutooqalersinnaasut.

Tamatuma saniatigut, Kalaallit Nunaata silaannartaani imartaanilu satellitsikkut periarfissat killeqarmata, Danmarki tamakkiisumik nakkutiginnissinnaanngitsoq.

/ritzau/