Ministeri tikeraarpoq
Antorini meeqqerivimmut Paarsisumut Qeqqatalu Ilinniarnertuunngorniarfianut ippassaq pulaarpoq.
Danmarkimi meeqqanut ilinniartitaanermullu ministeri siullermeerluni nunatsinnut tikeraarpoq, Danmarkimi naalakkersuisut siorna septemberip qaammataani ivertinneqarmatali.
Ullup qeqqata siorna Naalakkersuisoq Palle Christiansen ataatsimeeqatigineqassaaq, ilaatigut meeqqat atualinnginnerini, meeqqat atuarfianni, pisinnaasaqalersitsilluni ilinniartitsinermi qaffasinnerusumillu ilinniartitsinermi pissutsit pillugit Naalakkersuisunit suliniutit saqqummiunneqassallutik.
Minister Christine Antorini tassanissaaq pingaartitaminik saqqummiussissaaq, ilaatigut Avannaamioqatigiit Atuarfiat Nutaaq, Nordic Networkimi suleqatigiinneq aamma ilinniartitaanermut tunngasut eqqartorneqassallutik.
Christine Antorini ualeru Inerisaavimmut pulaassaaq. Tassani pisortap Jens Jakobsenip nunatsinni ilinniusiorneq, meeqqat atuarfiata nalilersornera, ukioqqortussuseq malillugu misilitsittarnerit kiisalu atuartitsinermi ilinniartitsinermi periaatsit pillugit oqaluttuarissallugit.
Christine Antorini arfininngorpat Danmark-imut utissaaq.
