Ministeri politikkikkut siunnersorti nutaaq pillugu: Pissaanillit pillugit sillimaniarnermut polikkiuvoq
Illersornissamut ministereqarfik Nuummi inissisimasumik politikkikkut siunnersorteqalissaaq.
Siunnersorti danskit kalaallillu oqartussaasuisa akornanni apeqqutini sillimaniarnermut tunngatillugu apeqqutinut, nunarsuarmi qeqertat annersaanni amerligaluttuinnartuni attaveqaataassaaq.
AAMMA ATUARUK Nunatta Danmarkillu qarasaasiatigut isumannaallisaanissaq isumaqatigiissuteqarfigigaat
Russimmi Kinamiullu minnerunngitsumillu amerikamiut piffissami Issittumik samminninneranni Sermersuullu aakkiartornerani imaatigut angallaffiusinnaasut nutaat ammarneranni, russit aqqartartuisa naalagaaffiillu allat Kalaallit Nunaata eqqaani toqqoqqasinnaaneranni danskit Illersornissamut ministereqarfianit sillimaniarnermut siunnersortaat Nuummi Issittumi Sakkutooqarfimmi inissisimassaaq.
- Illersornissamut politikki suli politikkiunerulerpoq. Paassaannaananilu aqerluinnaanngilaq, allarpassuarnimmi aamma atuuffeqarpoq, Trine Bramsen oqarpoq.
Amerikamiut allaffiata sanianiissasoq
Siunnersortitut atuuffik Illersornissamut ministereqarfimmi atorfilinnit nikerartumik atuuffigineqartassaaq. Illersornissaqarfik Nuummi Issittumi Sakkutooqarfimmik nunatsinni upalungaarsimanerup ilaanik oqartussaaffeqarnermillu illersuinermik suliaqartumik peqareerpoq.
Siunnersortilu Illersornissaqarfiup iluani aamma allaffeqassaaq. Siunnersortili ilumoortumik Rigsombudimi ministereqarfiup sinniisoqarfiani allaffeqaannarsinnaanngila?
Tamanna Trine Bramsenip ima oqaaseralerpaa:
- Una pissaanillit akornanni sillimaniarnermut tunngasuuvoq. Nunarsuarmi ullumikkut pissutsit ukiualuit matuma siornatigut pissutsinit allaanerupput, illersornissamut ministeri Trine Bramsen oqarpoq.
AAMMA ATUARUK Assit takukkit: Amerikamiut sinniisoqarfiata erfasoq Nuummi amugaa
Taamaammallu atorfilik Illersornissaqarfiup Issittumi Sakkutooqarfimmi sulisuisa akornanniissaaq.
Taamaalilluni politikkikkut siunnersortip USA-p Nuummi sinniisoqarfiata aqutsisua nutaaq, juunimi atorfinittoq Sung Choi allaffimmi sanilerissavaa.
Nuummi Hans Egedep Illorsuata saani tusagassiortunik katersortitsineq. Assi: Malik Brøns, KNR
Danskinilli siunnersortimik atuuffeqartitsineq USA-p taama ilioqqammerneranik pissuteqanngitsoq, Trine Bramsenip erseqqissaatigaa.
- Aalajangiineq una qangali aalajangerneruvoq, taamaammat tassunga tunngassuteqanngilaq. Danskit-kalaallillu suleqatigiinnerannut tunngavoq, ministeri oqarpoq.
Oqarasuaatikkut oqaluunneq naammanngitsoq
Siunnersortip atorfissaa kalaallit politikeriinut qaninnerulernerullunilu qanimut oqaloqatigiinnerulersinnaallunilu paarlaasseqatigiinnerussaaq.
- Sillimaniarnermullu tunngatillugu amerlasuut oqarasuaatikkut oqaloqatigiissutigineqarsinnaapput, kisianni aamma iimminut qanilluni oqaloqatigiinnissaq ilaatigut pitsaanerusarpoq, Trine Bramsen oqarpoq.
AAMMA ATUARUK Immikkut ilisimasalik: Issittumi nakkutiginninnissamut milliardinik atuiniarneq isumatsialaavoq
Trine Bramsen ulloq ataaseq nunatsinniippoq. Taassuma nunanut allanut tunngasunut aamma nukissiuuteqarnermut naalakkersuisoq Steen Lynge (D) ilaatigut ataatsimeeqatigaa.
Taakku illersornissamut missingersuutinit 1,5 milliardit koruunit qanoq ilillutik Issittumi nakkutilliinermut atorneqarsinnaanerat oqaloqatigiissutigaat.
Illersornissamut ministerip illersornissaqarfiup InterForcemi allaffia nutaat aamma ammarpaat Nuummilu sakkutuujusimasut caféat pulaarlugu.
