Ministeri aaqqiissuutissanik iliuuseqarnianngikkallarpoq
Pinerlussimasut sivisunerpaamik qaammatini arfinilinni pineqaatissinneqarsimasut saammaanneqarsinnaanerannik oqallinnerup nalaani tusarfiginagu, Inatsiseqarnermut ministeri, Morten Bødskov kiissa pernaammik qisuariarpoq.
Taassumalu siunnersuunni attattuarsinnarpaa.
- Isumaqarpunga maanna paasineqartariaqalersoq ajornartorsiutip sukumiisumik aaqqinneqarnissaa maanna pisariaqalermat.
Qallunaat Inatseqarnermut ministeriat, Morten Bødskov taama oqarmat, Inatsiseqarnermut tunngasunut Naalakkersuisoq, Anthon Frederiksen tunniutiinnarpasissimalluni nalunaarpoq.
- Nassuerutigisariaqarpoq maannakkorpiaq qanoq iliuuseqatoqarsinnaanera ajornakusoortinneqartoq pingaartumik inissiisarfiit taama amigartigitillugit, Anthon Frederiksen oqarpoq.
Pinerlussimasunut inissiisarfiit, Nunatsinni arfineq marluusut ulikkaaqqajuarnerisa kinguneranik pinerlussimasut eqqartuunneqareersullu ukiuni arlalissuarni inissinneqarnissaminnut utaqqisut maanna 300-ut tungaanut amerlassuseqarput.
Tamannarpiarlu pillugu qallunaat siornatigut statsministeriat, Lars Løkke Rasmussen siuttoralugu, isumakkeerinnittarnissamik siunnersuut Nunatsinni Naalakkersuisunut siorna martsimi tusarniaaffigineqarsimavoq, tassalu tamassuma akineqarnissaa utaqqineqartoq Morten Bødskovip oqaatigaa.
- Akissutissaq utaqqivarput, isumaqarpunga isumakkeerinnittarnissamik siunnersuut pitsaasuusoq. Neriuutigaara tamanna atorneqarluarumaartoq aaqqiissutissatullu pitsaasutut isigineqarluni isumaqataaffigineqarumaartoq, Morten Bødskov oqarpoq.
Qallunaat Inatsiseqarnermut ministeriata Anthon Frederiksenimut neriorsuutigaa, pinerlussimasut utaqqisitaasarnerujussuisa qaangernissaa siunertaralugu misissuisitsisoqassasoq. Tamanna aappaagumut aningaasanut inatsisissamit aningaasalersorneqarnissaa siunnersuutigineqarluni.
- Ajornartorsiut ima angitigisoq paasiumaneqanngitsutut ippoq. Taamaallaalli paasisimasakinneq pissutaagunarluni aappaagumut aningaasaliinikkut pissutsit misissuiffigineqarnissaannik qulaajaasoqarnissaanillu misissuisitsisoqarnialerpoq, Inatsiseqarnermut tunngasunut Naalakkersuisoq, Anthon Frederiksen oqarpoq.
Nunatsinni pinerlussisimasut amerlivallaarneri Qallunaat Nunaanniit aaqqiivigineqarnissaa siunertaalluni tusarniaasimaneq Naalakkersuisunut siorna anngunneqartoq Inatsisartunut suli anngunneqanngilaq.
