Ministereq: Silap pissusia pillugu anguniakkagut suli annertupput
![Qaanaap eqqaani iluliaq](/sites/default/files/styles/image_934x467/public/webform/20640175446_2ba1634097_o.jpg?itok=hXs2Kh9e)
Qallunaat naalakkersuisuisa Danmarkimi CO2-mik aniatitsineq 40 procentimik annikillisinniarnikuugaluarpaat.
Naalakkersuisulli nutaat atuutsilernerata kingorna, CO2-mik aniatitsineq 40 procentimik millisinneqassappat, Danmarkimi inuuussutissarsiornermut kingunerlutsitsinissaanik ernumassuteqarnerat pissutigalugu tamanna 37 procentimut appartinniarneqarpoq.
Anguniakkap taama allanngortinneqarnera pillugu Inuit Ataqatigiit siulittaasuat, Sara Olsvig sapaatip akunnerata siuliani isornartorsiuivoq, CO2-mik aniatitsinermi kingunipiluit Nunatsinnut tuttarneri ilaatigut tikkuarlugu.
Danmarkimiilli anguniagaq millisinneqaraluarluni suli annertusoq, Lars Christian Lilleholt oqarpoq.
- CO2-mik aniatitsinerup 37 procentit 38 procentillu missaanni 2020-mi millineqarnissaa, Danmarkimi naalakkersuisut anguniarpaat. Anguniagarlu iluatsissappat, Danmark nunarsuarmi tamani CO2-mik aniatitsinermi annikillinerpaanut ilaanniissaaq, Danmarkimi silap pissusianut nukissiuuteqarnermullu tunngasunut ministereq, Lars Christian Lilleholt oqarpoq.
Taanna aamma oqarpoq, CO2-mik aniatitsinermut 2050-mut millisaaniarneq suli annertunerussasoq.
- Taassuma saniatigut, aamarsuarnik, uuliamik naturgassimillu ikummatissamik 2050-imi atuiunnaarnissaq naalakkersuisut anguniarpaat. Taassumallu iluatsinnissaanut tamaviaarpugut, Lars Christian Lilleholt oqarpoq.
CO2-mik aniatitsinerup millisaanissamik anguniakkap appartinneqarnera pillugu pinngortitamut, avatangiisinut inatsisinillu atuutsitsinermut naalakkersuisoq, Mala Høy Kukó akuliukkusunnani KNR-imut oqarpoq.