Mininnguaq Kleist Bruxellesimi sinniisoqarfimmi pisortanngussaaq
Sinniisoqarfimmi pisortatut atorfik apriilip aallaqqaataani 2016-imi inuttaarutissaaq, Lida Skifte Lennert ulloq taanna Københavnimi sinniisoqarfimmi pisortanngorluni atorfinissammat.
Mininnguaq Kleist 2013-imi septembarimili Naalakkersuisut Siulittaasuata Naalakkersuisoqarfiani pisortatut (pisortaanermut tullersorti) sulivoq. Mininnguaq Kleistip tamanna sioqqullugu Nunanut Allanut Pisortaqarfimmi immikkoortortaqarfimmi pisortatut aamma allaffimmi pisortatut atorfeqartarpoq. Tamatuma saniatigut Mininnguaq Kleist 2007-2009-imi taamanikkut Naalakkersuisut siulittaasuata allattoqarfiani namminersornermut allaffimmi immikkoortortaqarfimmi pisortatut atorfeqarpoq.
Aamma atuaruk Nunatta Københavnimi sinniisoqarfiani pisortassaq toqqarneqarpoq
Namminersorlutik Oqartussat nunani allani kiffartuussisarneranni atorfinitsitsisarneq pillugu Namminersorlutik Oqartusssat nalunaarutaat nr. 13., 12. november 2013-imeersoq naapertorlugu, atorfik Namminersorlutik Oqartussat qitiusumik allaffeqarfianni sulisunut suliffiup iluani allagarsiissutigineqarpoq. Kalaallit Nunaata Sinniisoqarfiani sinniisoqarfimmi pisortatut atorfimmut qinnuteqaatit pingasut tiguneqarput.
