Minik Rosing: Saharap kujataanut sioraarniarsinnaavugut

Sermersuaq aakkiartorpoq. Sermersuullu kangerlukkut uukkarnerani qaarsummut mangiuuppoq. Qaarsuk mangiarneqartoq kangerluup imaanut akuleruttarpoq - taanna taaneqartarpoq qaarsummiit mangiaaq, danskisut gletchermel.

Ukiualunnguit qaangiupput, Kangerlussuarnut milernermi marullussuaq immap killinganiittoq arlaanut atorneqarsinnaaneranik ujarassiooq Minik Rosing isumassarsimmat. Taamaalluarsinnaavormi. Tamannami qaarsummiit mangiaavoq. 

- Nunani kiattuni sumiluunniit nunap ajortorujussuusoq takuneqarsinnaavoq. Oqaanaraani nunarsuup ilarujussuani aamma taamaattoqartoq, nunarlu ajunnginnerusuuppat nunaatilittut pissarsinarnerusinnaasuni. Taakkunanilu nunani amigaatigineqartoq tassaavoq qaarsummit mangiaap akussai, Minik Rosing KNR-imut oqarpoq.

Erlinnartuaqqat

Qaarsummiit mangiaq sioraaqqanit minneruvoq nunatamiillu aserortigaalluni. Nunataq ujaqqat akuinik naasunut pisariaqartunik naggorissaatissaqarluarpoq.

- Kiguterissaassagaanni immuttortoqassaaq, pissutigalugu immuk kalciumitaqarmat. Kalcium immummiittoq ivikkani akuutissaneersuuvoq, nersussuullu nerineratigut immummiilertarluni.

- Inuussutissat pisariaqartippagut, taakkulu naasunit nerisatsinnit pissarsiarisarpagut, naasulli nunamit naaffigisaminnit naggorissaatissarsisarput.   

AAMMA ATUARUK Nunarput nunarsuarmi nerisassaqartitsinermik qulakkeerisinnaasoq

- Nuna naggorissaateqanngikkuni naanerlussapput, immaqalu nerineqarnissaat peqqinnassanatik. Qaarsummiilli mangiaaqalersitsigaanni nunami naasut naggorissaatigisinnaasaannik pissarsititsisoqassaaq.

Taakkulu assersuutigalugu iffianit imaluunniit qanoq nerisarpagut?

- Tassa taama aap, Minik Rosing oqarpoq.

Isumassarsiatoqaq ineriartorteqqinneqartoq

Minik Rosingip Future Greenlandimi 2017-imi maajimi saqqummiinermini nunarput nunarsuarmi inuussutissanik amigaateqarnermut ikiuutaasinnaanerarpaa. Tamatumalu kingorna angusaqarluarniarsarilerluni.

- Ukiualuit matuma siorna isumassarsiarineraniit Ghanami Afrikamiittumi Danmarkimilu misiligarparput. Iluaqutaanissaaalu takorluugaannaanngitsoq paasivarput. Naggorisaatigigaanni pissarsinarnipilussuuvoq, Minik Rosing oqarpoq.

Nunarput silap pissusiata ajorsigaluttuinnarneranik ilisimaneqaannarnani aamma nunarsuamut tamarmut soqutiginaatilimmik iluarsiiniaqataasutut nunanit allanit ilisimaneqartuuppat nuannissagaluaqaaq

- Iluaqutaasoq maanna paasigatsigu, Kalaallit Nunaanni suliffiutillit tunisassiariviliarlugu aallartinnnissaat piffissanngorpoq. Soorunami Kalaallit Nunaanniit aallaavilimmmik Kalaallit Nunaannullu suliffissaqartitsilerluni isaatitsissutaalissasoq neriuutigaara, Minik Rosing oqarpoq.

Pissaqarluarporlumi. Sermersuaq qarsumik mangiaanermini ukiut tamaasa milliard tonsinik mangiaaliortartoq, nunap pissusianik ilisimatooq oqarpoq,

- Annertungaarmata kissaatigineqaruni aningaasassaqartinneqarunilu nunarsuarmi piumasunut tamanut tunniussaqarsinnaavugut. Kisissaavallaanngitsumik annertussuseqarpoq, Minik Rosing oqarpoq.

Iluatsinnissaanut suna pisariaqarpa? Qanoq iliussaagut?

- Nivaataqassaagut. Taamaaliinnarlugu piareersinnaavoq, Minik Rosing quiasaarerpalaarluni oqarpoq, taamami ajornaatsigivallaanngilaq.

- Qanoq ililluni assaasoqarsinnaanera sumiinnerisalu paasiniarnissaat pisariaqarpoq. Maqullunnimi annertuuni kiviorarsimasuniipput.

- Suliffeqarfimmik nunarusarmi pisisartunut attaveqarsinnaasumik, nunatsinni tunisassiorsinnaasumik umiarsuarmillu usilersueriarluni nassiussisinnaasumik pilersitsinissaq soorunami pisariaqarpoq, nunap pissusianik ilisimatooq oqarpoq.

Qaarsummit mangiaamit qanoq ilippanartoqartigisoriviuk?

- Kalaallit Nunaannut ilippanartoqangaatsiarsoraara, annertoorujussuuvormi. Tamatta ilisimavarput – nunatsinni sumiiffinnit tamaniippoq.                                                 

Ajornartorsiutaasumut aaqqiissutaasinnaasoq

- Taava tunisassiornikkut nunani allani piitsuuneq nerisarlunnerlu akiorsinnaagutsigit, nunatsinni inuussutissarsiuutigaluta aamma pingaaqisumik nunarsuarmi ajornartorsiutinik iluarsiiniaqataasinnaavugut.

- Nunatta nunanit allanit isigineqarnera pitsaanerulissagaluarpoq, nunarpullu silap pissusiata ajorsigaluttuinnarneranik ilisimaneqaannarnani aamma nunarsuamut tamarmut soqutiginaatilimmik iluarsiiniaqataasutut nunanit allanit ilisimaneqartuuppat nuannissagaluaqaaq, Minik Rosing KNR-imut oqarpoq.