Pituffiup eqqaani aatsitassarsiornissaq 35 millioninik aningaasaliiffigineqalersoq
Aatsitassarsioqatigiiffiup BlueJay Miningsip Dundasimi suliniutaa matumani pineqarpoq, aatsitassamik ilmenitimik piiaaniartoqarpoq. Ilmenit titaniumoxidiliornermut atorneqartartoq qalipaatiliornermut, pappialaliornermut plastikkiliornermullu pingaaruteqarpoq.
Dundasimi suliniut 4 millionit pundinik, tassa 35 millionit koruuningajannik aningaasaliiffiginiarneqarpoq, Vækstfondenip Greenland Venturellu Kalaallit Nunaanni suleqatigiinneranni suliniutinut aningaasaliinerit pingaarnerit ilaannut ilanngulluni.
Ilmenit nunarsuarmi piumaneqaleraluttuinnarpoq, nunattalu avannaata ilmeniteqassusia isumalluarnartutut nalilerneqarpoq, ilmenitimi piiarniarneqartoq akuitsuulluunilu piiaruminartuusoq, Greenland Venturep tusagassiutinut nalunaarummi allaaseraa.
AAMMA ATUARUK Nunatta ataa minguinnerpaamik titaanitalimmik saviminissaqarsinnaasoq
- Pingaartumik ilmenitip pitsaassusaa tunisassiarineqarsinnaalernissaatalu pitsaanera suliniut soqutiginartuutippaat, Greenland Venturep pisortaanera Karsten Høy oqarpoq, nangillunilu:
- Tunisassiarineqalernissaanut periarfissat annertupput, avannaanilu suliffissaqartitsiniarnermut iluaqutaassalluni. Kalaallit Nunaanni aatsitassarsiornermut annertusiartuinnartumut suliniut pissanganaqaaq, tassungalu peqataanissarput pissusissamisuuginnarpoq, Karsten Høy oqarpoq.
