Mimip pinerlussimasunut isumaginnittoqarfik isoraa

Aviisimi Atuagagdliummi, februaarip 22-anni saqqummersumi, Pinerlussimasunut Isumaginnittoqarfiup pisortaata, Thomas Nikolajsenip oqaaseqaatai, Mimi Karlsenip allaatigisamini isornartorsiorpaa.

Pinerluttunut inissiisarfinni arnat kinguaassiutimikkut pissusissamissuunngitsuliorfigineqartarneri, Thomas Nikolajsenip oqaluuserineqarneri matuniarlugillusooq oqaaseqaatigimmagit, Mimi Karlsenip tamanna isornartorsiorpaa.

- Eqqarsarnartoqartippara Pinerlussusimasunut Isumaginnittoqarfiup pisortaata malittarisassat innersuutigalugit akisussaaffini qimarratigimmagu, arnallu inissiisarfinniittut pissusissamisuunngitsuliorfigineqarsimasut tatigisaajunnaarsinniarsaralugit, Mimi Karlsen allaaserisamini allappoq.

Nunatsinni pinerlussimasunut inissiisarfinni pissutsit pillugit ph.d.-mik allaaserisaqartup, Annemette Nyborg Lauritsenip saqqummiussinerata kingorna oqallinneq aallartippoq.

- Pingaartorujussuartut isigaara, Annemette Nyborg Lauritsenip inissiisarfitsinni pissutsit pillugit allaaserisaa misissorluassallugu aammalu arnat kanngutsaattuliorfigineqartarnerat unitsinneqartariaqartoq isumaqarlunga, Mimi Karlsen allappoq.

Pinerlussimasut pinerloqqinnginnissaat siunertaralugu Naalakkersuisut maanna pilersaarusiuleruttorput pinerlussimasunut katsorsaaviliortoqarnissaanik.

Taamatut katsorsaaviliornissamut paasisassarsiorluni Mimi Karlsen maanna USA-mi Washingtonimiippoq isumasioqatigiinnermut peqataalluni.