Mimi Karlsen: Ilinniartut tamarmik danskist tuluttut qallunaatullu oqalussinnaasariaqarput
Kalaallisut, danskisut tuluttulluunniit? Naligiissitaanermut naalakkersuisoq Mimi Karlsen oqaatsit pillugit qineqqusaarnerup nalaani oqallinnermut akuusimanngilaq, maannali ilanngulluni:
- Meeqqat atuarfianni oqaatsinik taakkuninnga assigiinngitsunik pingasunik amigaateqarneq soorunami ajornartorsiutaavoq, kisianni tassa pingaartinneqartariaqarpoq oqaatsinik taakkuninnga ilinniartitsisussanik pissarsiniarnissaq, Naligiissitaanermut naalakkersuisoq Mimi Karlsen oqarpoq.
Atuartut ilinniartullu kalaallisut danskisullu ukiut qulit tulliuttut ingerlaneranni oqalussinnaanissaat pillugu inatsisitigut anguneqarsinnaanissaa, taassuma takorloorpaa
- Uani tassa aallarniutigalugu tassa pivakka meeqqat atuarfianni atuartut, taakku pinngitsooratik kalaalisut ilikkarnissaat pingaartutut isigalugu. Soorunami atuarfinni assigiinngitsuni ilinniartitsisussaaleqinerit akornutaassappata tamanna aamma oqaloqatigiinnikkut periarfissanik ujartuisariaqarpugut, kisianni pingaarpoq tassa nunatsinni meeqqat atuarfianni atuartut tamarmik kalaallisut oqalussinnaanissaat, Mimi Karlsen oqarpoq.
Ilinniartitaanermut naalakkersuisup Palle Christiansenip naalakkersuisoqatimi siunnersuutaa tapersersorpaa, nalorninartoqartilluguli:
- Maleruagassat naapertussagaanni takuneqarsinnaavoq ilinniartitsisussaaleqisoqartoq, pingaartumik tuluttut ilinniartitsisussanik. Atuartut ilinniartullu tuluttut oqalussinnaanissaat inatsisitigut anguniarneqassappat, taava tuluttut ilinniartitsisussanik amerlanerusunik atorfinitsitsisariaqarpugut, ilinniartitsisunngorniallu amerlanerit tuluttut ilinniartitsisinnaalernissartik toqqartariaqassallugu. Ilinniartitsisunngorniat tuluttut ilinniartitsisunngornissaannut qanoq iliornikkut kajumissaarneqassanersut naluara. Imaassinnaasoq immikkut ittumik ilinniartinneqassanersut, aningaasarsiatigulluunniit pilerisaarneqarnermikkut tamanna toqqarsinnaassaneraat naluara, kisianni piffissap tamanna takutikkumaarpaa, ilinniartitaanermut naalakkersuisoq Palle Christiansen oqarpoq.
Ilinniartitsisut Meeqqat Atuarfianneersut Kattuffiata neriuutigaa siunnersuut piviusunngortinneqarsinnaassasoq, ajornartorsiutilli assiginngitsut eqqarsaatigisassaasut, IMAK-ip siulittaasuata Sivso Dorphip oqaatigaa, inatsisitigut piumasaqaatit ilaatigut naammassineqarsinnaannginnerarlugit:
- Ilinniartitsisussaaleqivugut massakkut, taamaattumillu ukunani oqaatsini pineqartuni aamma ilinniartitsisussaaleqinerput eqqarsaatigalugu isumaqarpunga pingaaruteqartorujussuusoq atuartitsivinni ataasiakkaani pikkorissaanissaq taakkunani aamma annertuumik ingerlatsinissaq, soorlu qallunaatoortitsisussanik amigaateqarpugut, taamaattumik qallunaatoortitsisinnaanissamut pikkorissaasariaqarpugut. Tuluttoortitsisussanik amigaateqarpugut, aamma taamannak ingerlatsisariaqarpugut. Taamaattumik isumaqarpunga aqqutissat uku ingerlariatfigissagutsigit taava aamma tamakkiisumik atuarfinnut tunniussinnaasavut qiviarneqartariaqarput, IMAK-ip siulittaasua Sivso Dorph oqarpoq.
