Nannut piniartullu ilisimatusarfiginerat aningaasaliiffigineqartoq
![](/sites/default/files/styles/image_934x467/public/article_images/20160313_121028.jpg?itok=f26IoTy9)
Kristin Laidrep, nannut Issittumi tamarmi qanoq issusiannik misissuinissaminut, Kalaallillu Nunaanni sumiiffinni nanoqarfiusuni piniartut nannunniartartut inuunerat pillugu assiliartalersorlugu allaaserinninnnissaminut atorniarpai.
Piniartut pillugit assiliartalimmik allaaserisani atorlugu ilisimatusartartut sulinerminni piniartunik nannunniartartunik suleqateqarnerisa pingaruteqassusiat attatiinnarneqarnissaallu Laidrep ersersikkusuppaa.
Nannut pillugit ilisimatusaatigalugu suliat Tunumi inoqarfinni nannunit qaninngoorneqarnerusartuni aallartinneqassapput, assiliisartoq Finlandimiu Tiina Itkonen, amerikamiulu allaaserinnittartoq Susan McGrath, suleqatigineqassallutik.
- Illoqarfinni nunaqarfinnilu piniartut ilaqutaallu inuuniarnerminnut pingaarutilimmik nannunniartartut tikeraassavagut. Silap pissusiata allanngoriartornerata piniartukkormiut inuuniarnerannut avatangiisaannullu qanoq sunniuteqarnera piniartunut oqaluttuaritikkusupparput, Kristin Laidre oqarpoq.
Tasiilami nunaqarfittaanilu piniartunik apersuillunilu assileeqattaarnerit qaammammi uani aallartissasut, Pinngortitaleriffiup allaaseraa, Kristin Laidrellu suleqataasalu tamatuma kingorna Qaanaaq Ittoqqortoormiillu taakkualu nunaqarfii aamma tikissamaarpaat.