Præsidentinngorniuttut oqallitsinneqarnerminni mikrofoonii qaminneqartassasut

USA-mi præsidentit oqallitsinneqartarnerannut ataatsimiititaliap præsidentit oqallitsinneqartarneranni malittarisassat allanngortippai. Taamaammat qinigassanngortittut Donald Trump Joe Bidenilu aqaguagu sisamanngornermi unnukkut oqallitsinneqalerpata aappaata aallarniutigalugu oqaaseqarnerani aappaata mikrofonia qaminneqassaaq.

Nutaarsiassaqartitsivik AP taama allappoq.

Qineqqusaartut oqallinneranni sammineqartussat ataasiakkaat sammineqaleraangamik tamarmik immikkut akornusersorneqaratik minutsini marlunni oqaaseqarsinnaasasssapput. Oqallinneq nalunaaquttap akunnerup aappaata affaanik sivisussuseqassaaq.

Republikanerit sinnerlugit qinigassanngortittoq Donald Trump, demokratillu sinnerlugit qinigassanngortittoq Joe Biden qinersinissamut atatillugu kingullerpaamik aqagu sisamanngornermi oqallitsinneqassapput, nunatta nalunaaqutaa naapertorlugu unnukkut aqqanermut oqallitsinneqassallutik.

AAMMA ATUARUK Aaqqissuussisoq: Trump Bidenilu oqqateqqissanngillat

Qineqqusaartut marluk sapaatit-akunneri pingasut matuma siorna siullermik oqallitsinneqarput, tassanilu oqqattoqartarlunilu aappaata oqalunnerani akornusersuisoqaqattaarluni. Oqallitsitsinermilu malittarisassat allanngortinneqartut, ataatsimiititaliap arlaannaannulluunniit attuumassuteqanngitsup kingorna nalunaarutigaa.

Malittarisassat allanngortinneqannginnissaat Trumpip qineqqusaarnerminut atatillugu ataatsimiititaliaanit kimigiiserfigineqarsimagaluarpoq, akerlianillu torernerusumik oqallitsitsisoqarnissaa Bidenip kissaatigigaa.

Malittarisassanillu allanngortitsisoqaraluartoq Trump oqallinnissamut piareersimasoq, Trumpip ataatsimiititaliaata nalunaarutigaa. Bidenip ataatsimiititaliaa malittarisassat allannngortinneqarnerannut suli qisuariaateqanngilaq.