Aaqqissuussisoq: Trump Bidenilu oqqateqqissanngillat
USA-mi præsidentimut qinersisoqarnissaanut oqallitsitsinermi ataatsimiititaliap, CPD-p, Donald Trumpip Joe Bidenillu tv-kkut oqallinnissaannut tulliuttunut marlunnut oqalliseriaatsit allanngortinnialerpai.
Pingasunngornerup unnuaani oqallinneranni uippakajaarneq pinngitsoortinniarneqartoq, USA-mi tusagassiorfiit arlallit, soorlu NBC News Huffington Postilu taama allapput.
- Ippassaq oqallinneranni misigisat takutippaat oqalliseriaatsip ilusaa allanngortinneqartariaqartoq, oqaluuserisassat sukumiinerusumik oqallisigineqarnissaat taamaaliornikkut anguneqassaaq, CPD nalunaarpoq.
AAMMA ATUARUK Bidenip Trump tv-kkut oqallinnermi nipangeqqugaa
Qineqqusaartut marluk oqqallutillu aqukkuminaatsut oqaatigineqarpoq. Republikanerit qinigassanngortitaata, Donald Trumpip, Joe Biden akornusersoqattaarpaa, oqallittoqarneranillu aqutsisup Chris Wallacep Fox Newsimeersup tamanna Trumpimut ilisimatitsissutigaa, Trumpili oqalunniinnalerluni.
Oqallittut torersumik oqallinnissaannut Wallacep ilungersuuteqarnera CPD-p nersualaarpaa, oqallinnissanulli tulliuttunut allannguisoqalersaartoq nalunaarutigalugu.
Oqallinnissanili tulliuttuni marlunni aqutsisussat oqallittut aappaa oqalukkaangat aappaata mikrofonia aqutsisumit qaminneqarsinnaassanersoq ilisimatitsissutigineqanngilaq. Oqallittut ataatsikkut oqaluttannginnissaat taamaaliornikkut anguneqarsinnaassammat.