Mikael Thinghuus Royal Greenlandimi suliunnaalersoq
Mikael Thinghuus ukiuni aqqanilinni Royal Greenlandimi pisortaaneroreerluni ingerlatseqatigiiffiup siulersuisuinik isumaqatigiissuteqarnermigut 2022-mi aasap ingerlanerani atorfimminit tunuassaaq.
Aalisakkerinermik suliffeqarfissuaq tusagassiuutinut nalunaarummi taama allappoq.
Thinghuus 2010/2011 ukiup nikinnerani Royal Greenlandip aningaasaqarnikkut ingerlatsinikkullu
ajornartorsiornerpaaffiani atorfinippoq. Ingerlatseqatigiiffik kingorna pitsanngorsaavigineqarpoq - aningaasaqarnikkut, niuernikkut ingerlatsinikkullu.
Amigartooruteqarneq annertooq piffissap ingerlanerani annertuumik sinneqartooruteqarfinngorpoq.
AAMMA ATUARUK Kuupik Kleist: Nalunaarusiaq erseqqivissumik akissutissiinngilaq
Aallussat Royal Greenlandip 2011-mi ingerlataasa affai sinnerlugit tunineqareerput. Tunisinermiit
iluanaarutit ilaatigut ingerlatseqatigiiffiup 2010-mi ajornartorsiornerata nalaani.
Mikael Thinghuusip, 2022-mi juunimi 60-inik ukioqalertussap, eqqarsaatigilluareerlugu atorfimi
nukissanik nutaanik pilimmik inuttalerneqarnissaa Royal Greenlandimut imminerminullu pitsaasuussasoq aalajangerpaa.
- Royal Greenlandimiinnera inuuninni nuannernerpaat ilagaat, Thinghuus oqarpoq, nangillunilu
- Suliarisimasagut angusimasagullu tulluusimaarutigaakka. Royal Greenland suliffeqarfiuvoq ullumikkut patajaalluinnartumik inissisimasoq, sumut ingerlanissaminut nalorninngitsoq – taamaammat ingerlatseqatigiiffiup siunissaa eqqarsaatigalugu isumalluangaarpunga, Thinghuus oqarpoq.
Ingerlatseqatigiiffimmi siulersuisut siulittaasuat Niels de Coninck-Smith ima oqaaseqarpoq.
- Kingoraartissaanik nassaarniarluta siammasissumik pimoorussisumillu inuttassarsiorneq aallartissimalerparput. Sivisulaassagunarpoq, taamaakkaluartorli inuttassarsiuussinerup eqaatsumik ingerlanneqarnissaanik Mikael Thinghuusilu isumaqatigiissuterput naapertorlugu periarfissagissaarpoq, tassami Mikaelip Royal Greenland piffissami sivisulaartumi ikiussavaa.
