Kuupik Kleist: Nalunaarusiaq erseqqivissumik akissutissiinngilaq
- Kisianni misissuinerup ilimanarsisippaa, Royal Greenlandimi pissutsit qanoq ittuusut taamani naalakkersuisut nalunngikkaat, Kuupik Kleist oqarpoq.
- Taamani naalakkersuisuusuni 2008-mi aammalu 2009-p aallartinnerani Royal Greenlandimut tunngasut oqaluuserineqartarsimapput, aammalu pissutsit qanoq innerannik Naalakkersuisunut nalunaarusiortoqartarsimalluni. Naalakkersuisunut apuunneqarsimasut Ilimanarsisippaat, Royal Greenlandimi aningaasarsiornikkut pissutsit qanoq ittuunerat tamarmik ilisimasisimassagaaat, Kuupik Kleist oqarpoq.
Aningaasarsiornikkut Nunarsuaq tamakkerlugu ajornartorsiortoqalermat, tamanna suliffeqarfinnut Namminersornerullutik Oqartussanit tamakkiisumik ilaannarmilluunniit pigineqartunut qanoq sunniuteqarnersoq ilisimatitsissutigineqarpoq. Tamanna novembarip 24-ani 2008 pivoq.
Suleqatigiititat marsip 23-ani 2009 nalunaarusiassatut missiliuut qalunaatooq piareerpaat. Tamatuma kingorna kukkunersiorneqarpoq, iluarsaanneqarlunilu.
Tamatumali kingorna taamani naalakkesuisunut siulittaasuusoq Hans Enoksen qinersinissamik nalunaaruteqarpoq, taamanilu naalakkersuisuusut ministereqarfiugallartutut atuummata nalunaarusiaq tunniunneqarsinnaanngilaq.
Nalunaarusiaq naammassineqarsimasoq kalaallisunngortinneqarsimasorlu juunip aqqarnani aatsaat piareerpoq.
Tassalu Finn Karlsenip aalajangiusimavaa, Royal Greenland-ip aningaasanik qanoq amerlatigisunik pisiariaqartitsinersoq piffisami tassani ilisimasimanagu.
- Pappialat pisortatigoortut siaruarterneqarsimasut aammalu nalunaarusiat takussutissartaat toqqammavigisinnaavagut. Taakkualu soorunami akerlilersorneqarlutilluunniit upperineqarsinnaapput. Kisianni uagut periarfissarput tassaavoq, pisortatigoortumik takussutissat taakkua nalunaarusiorfigissallugit, taamaaliorsimavugullu.
Tassalu sukumiisumik oqarput, Finn Karlsen ilisimaareqqinnaaraa, sukumiisumillu paasitinneqarsimasoq, aat?
- Tassa taakkua toqqammavigalugit taamaappoq, Kuupik Kleist oqarpoq.
Finn Karlsen pissutsinik ilisimatinneqarsimannginnerminik uppernarsaatinik saqqummiissalluni arfininngormat oqarpoq. Taamaaliornissaanut Kuupik Kleistip tikilluaqquaa.
