Michael Rosing politikkimit tunuartoq
Michael Rosing ukiuni 15-ini politikerioreerluni, kommunalbestyrelsimut apriilip ulluisa arfernganni qinigassanngorteqqinniarnani, Sermitsiaq.AG-mut oqarpoq.
Michael Rosing Demokraatit tunuliaqutaralugit Inatsisartunut 2005-imi sinniisunngorpoq. Taanna qinigaaffinni marlunni sinniisuuffimminiiginnarpoq.
AAMMA ATUARUK Samarbejdsparti suli kinguaqqasoq
Folketingimut 2011-mi qinigassanngortippoq, qinigaananili. Michael Rosingilli taamani parteeqqataa, Jens B. Frederiksen, nunatsinni politikeritut 2014-imi tunuarmat, inatsisartuni issiavia ukiuni pingasuni kingoraarpaa.
Demokraatinili suleqatigiinniarneq ajalusoormat, ilaatigut Tillie Martinussen peqatigalugu suleqatigiissitsisunik taallugu nutaamik 2017-imi partiiliorpoq.
Suleqatigiissitsisut Inatsisartunut kingullermik 2018-imi qinersinermi inatsisartuni ataatsimik issiavinnapput.
Suleqatigiissitsisuni avissaartuuttoqartoq
Michael Rosing kommunalbestyrelsimut ukioq taanna qinersisoqarnerani sinniissutut aamma qinigaavoq.
Suleqatigiisitsisulli siorna tunuartimmagu, partiimi suleqateqarniarnera aamma ajalusoorpoq. Taanna Suleqatigiissitsisut maanna siulittaasuallu, Tillie Martinussen, siulittaasunngorniuunneranni Tillie Martinussenilu partiip aningaasaataanik atornerluisimasutut unnerluutigineqarmat partiimi tassani avissaartuutilerput.
AAMMA ATUARUK Suleqatigiisitsisut ilaasortani tallimat ilaasortaajunnaarsikkai
Suleqatigiissitsisunili avissaartuuttoqanngikkallarmalli nunatsinni politikeriujunnaarnissani aalajangersimagini, Michael Rosing Sermitsiaq.AG.-mut oqarpoq.
