Mette Frederiksenip savalimmiormiut nunanut allanut politikkimi oqartussaaqataanerulersikkusukkai

Danmarkip ministeriunera Savalimmiuni ulluni makkunani tikeraarnermini savalimmiormiut nunanut allanut politikkimi oqartussaaqataanerulersinnissaannut periarfissiinissaminut piareersimanerarpoq.
KNR-imiillu apriilimi apersorneqarnermini nunatta Savalimmiullu nunanut allanut politikkimi oqartussaaqataanerulersinneqarnissaannut oqalliseqataanissaminut piareersimanerarpoq. Assi © : Niels Christian Vilmann/Ritzau Scanpix
novembarip 08-at 2019 07:22

Ministeriuneq Mette Frederiksen (S) savalimmiormiut nunanut allanut illersornissamullu politikkimi akuliusimanerulernissaannut periarfissiinissaminut piareersimavoq.

Savalimmiuni tikeraarnermini savalimmiormiut lagmandiat, Bárður à Steig Nielsen, naalagaaffeqatigiinneq pillugu ataatsimeeqatigimmagu taama oqartoq, Ritzau allappoq.

- Savalimmiormiut nunanut allanut politikki soqutigisaminnut peqataaffigisaminnullu attuumassutilik pillugu annerusumik paasisimasaqarusuttut paasisinnaalluarpakka. Nunanut allanut politikkimut tunngatillugu savalimmiormiut oqartussaaqataanerulerusunnerannut isummeqataarusuppunga, Mette Frederiksen lagmandip najugaani Vestmannami ataatsimeereeramik oqarpoq.

AAMMA ATUARUK Nunarput nunanik allanik niueqateqarnermini ersarinnerusariaqarpoq

Mette Frederiksen oqartussaaqataanerulersinneqarnissaannik kissaateqaqqittoq

Mette Frederiksen Folketingemut apriilimi qinersisoqanngitsiartoq aamma taamatut oqarpoq.

KNR-imiillu apersorneqarnermini nunatta Savalimmiullu nunanut allanut politikkimi oqartussaaqataanerulersinneqarnissaannut oqalliseqataanissaminut piareersimanerarpoq.

- Savalimmiunummi Kalaallit Nunaannullumi pingaarutilinnik Københavnimi nalilersuisoqartarnera angusaqarfiungaarnavianngilaq, Mette Frederiksen apriilimi oqarpoq.

Kalaallit Nunaata naalagaaffeqatigiinni nunanut allanut tunngasunut politikkimi sunniuteqarsinnaanera sunniuteqarsinnaannginneralu oqallissaajuarpoq. Nunatsinni politikerit nunanut allanut tunngasut nunatsinnut attuumassutillit sunniuteqarfiginerunissaat kissaatigikkajuttarpaat.

USA-p præsidentiata Donald Trumpip nunarput pisiariumanerareeraalu IA-p Nunatta Qitornaasalu nunatta nunanut allanut politikkimi oqartussaaqataanerulernissaa kissaatigaat.

Savalimmiormiut nunartik sinnerlugu OL-imi peqataasalernissaannut akuersaartoq

Mette Frederiksen savalimmiormiut danskisut cpr-normoqalersinnaanerannut tunngasumik aamma oqaaseqarpoq, savalimmiormiullu Danmark sinnernagu nunartilli sinnerlugu OL-imi peqataasalersinnaanersut aperineqarpoq.

Mette Frederiksenilu taakkununnga tunngatillugu akersinissaminut piareersimavoq.

AAMMA ATUARUK - Savalimmiut nammineq erfalasuni atorlugu OL-mut peqataasalerli

- Taamaaliorusuppugut. OL-illi ataatsimiititaliaa apeqqutaavoq, taassumalu akuersinissaa pisariaqarpoq, Mette Frederiksen Ritzau naapertorlugu taama akivoq.

Kulturimut ministeriusimasup, Brian Mikkelsenip, IOC-imi præsidentiusimasoq, Jacques Rogge, 2006-mi ataatsimeeqatigimmagu Savalimmiut nunarpullu sinnerlugit nunatsinneersut savalimmiormiullu nunatik sinnerlugit OL-mi peqataasalernissaannut akuersitinniarsarigaluarpaa, iluatsinngitsumilli.

Mette Frederiksen ministeriunertut Savalimmiunut siullermeerluni pisortatigoortumik tikeraarpoq. Tallimanngorpat tungaanut tikeraassaaq.