Lars Løkke Rasmussen: - Savalimmiut nammineq erfalasuni atorlugu OL-mut peqataasalerli
![](/sites/default/files/styles/image_934x467/public/article_images/pal_joensen_630.jpg?itok=7PkE2Sbe)
Savalimmiormiut OL-imut ullumikkut ilaagaangamik danskit erfalasuanik atugaqartarput, savalimmiormiulli tamanna allanngortikkusuppaat, tamannalu Lars Løkke Rasmussenip maanna taperserpaa.
- Danskit naalakkersuisuisa savalimmiormiut nunat tamalaat OL-imut ataatsimiitiaanut ilaasortanngorniarnerat taperseraa Danmarkimi ministeriunertut oqaatiginiarpara, Lars Løkke Rasmussen allappoq, Savalimmiullu danskit naalagaaffianut ilaagaluarluni qeqertat namminersornermik oqartussaanermik annertuumik timersornermik suliassaqarfimmik ilaqartumik tigummiaqartoq erseqqissaatigalugu.
Savalimmiut OL-imut ilaalernissaanut kissaateqarnermi qeqertat 1984-imili Paralympicsinut ilaasortaalereersimaneranik tunngavilersorneqarpoq, savalimmiormiut innarluutillit OL-ertarneranni 13-inik saqqarmiunnannikuupput innarluutillillu timersortarneranni aqqanilinnik nunarsuarmi angusat annersaannik angusaqarnikuullutik.
Savalimmiormiut timersortartuisa kattuffianni siulittaasup Jon Gestoyip Lars Løkke Rasmussenip tapersiinera nuannaarutigaa Savalimmiulli timersornerni allani soorlu isikkammik arsarnermi, assammik arsaannermi sulorarnermilu nunat tamalaat akornanni timersortartut kattuffiini namminersortutut ilaasortaareersut erseqqissaatigalugu.
Lars Løkke Rasmussenip tapersiinera Danmarkip, Norgep Islandillu OL-imi ataatsimiititaliaannit aamma taperserneqarpoq.
Nunarput nunat tamalaat olympiademut ataatsimiititaliaanut suli ilaasortaalinngilaq taamaammat OL-imut peqataasut danskit erfalasuat atortarallassavaat.