NQ IA-lu Trump pillugu: Nunarput nunanik allanik niueqateqarnermini ersarinnerusariaqarpoq
![](/sites/default/files/styles/image_934x467/public/2019-05-29_12_29_25-aleqa_hammond_februar_2019.jpg_4240x2832.png?itok=QgFluXgu)
![](/sites/default/files/styles/image_934x467/public/mute.jpg?itok=pyY9QSVx)
Amerikami præsidentip nunatta tunineqarnissaata itigartitsissutigineqareerneratigut Danmarkimut tikeraarnissaminik kinguartitsinera mitalliineruvoq. Nunanut Allanut Sillimaniarnermullu Ataatsimiititaliami ilaasortaq taama isumaqarpoq:
- (Donald Trumpip, aaqq.) Taamaaliornera suleqatigiinnermut pitsaasumut annertusaataanngilaq. Aamma nunat tamalaat akornanni ataqqeqatigiittumik naligiimmillu isigaluni suleqatigeeriaaseqarnermut mitalliinertut taaneqarsinnaavoq, ataatsimiititaliami ilaasortaq, Múte Bourup Egede oqarpoq.
AAMMA ATUARUK Aki-Matilda Høegh-Dam: Præsident Trump nunatsinnut tikilluaqqusaavoq
AAMMA ATUARUK Trumpip tikeraarniarunnaarnerani Danmark sukataarnerusariaqarpoq
USA-p præsidentia attaveqaqatigiittarfikkut Twitterikkut marlunngornermi unnukkut ilaatigut ima allappoq:
- Danmark nunaavoq immikkuullarilluinnartoq innuttaasugissaartorlu, ministeriunerulli Mette Frederiksenip Kalaallit Nunaannik tunisissamik oqallisiginninnissamut soqutiginninnginnerarmat sapaatit akunneri marluk qaangiuppata naapinnissaraluarput piffissamut allamut kinguartippara, præsidenti Donald Trump allappoq.
Naalakkersuisut Siulittaasuata præsidenti Danmarkimilu ministeriuneq Danmarkimi ataatsimeeqatigisussaagaluarpai.
USA-llu præsidentiata nunatta pisiarinissaanut isumaqatigiinniarunnarani paasillugu Danmarkimut tikeraarnissaminik kinguartitsinera uggornanngitsoq, Nunanut Allanut Sillimaniarnermullu Ataatsimiititaliami siulittaasoq, Aleqa Hammond (NQ), isumaqarpoq.
- Oqaluuserisassaq taama ittoq tunuartiinnarneqarnera uggornanngilaq. Kisiannili tikinnissani taamaativinngilaa, oqaloqatiginninneruna kingusinnerusukkut pissasoq, Aleqa Hammond erseqqissaavoq.
AAMMA ATUARUK Trumpip Kalaallit Nunaat aningaasarpassuarnik tapiissutinillu akilerniaraluarpaa
USA-llu præsidentiata kinguartitsinera nunarput Kunngeqarfik Danmarkimut sillimaniarnikkut qitiusumik qanoq inissisimatigineranik ersersitsisoq, Múte Bourup Egede naliliivoq.
- Nunanik allanik ikinnguteqarnermut niueqateqarnermullu ilaatigut taamatut suleqatigiinnerit ammaassisarnerannut inissisimanerput qanoq pingaaruteqartiginersoq naalagaaffimmut Danmarkimut uani takuarput. Taannalu minnerpaamik nunatsinnut iluaqutitalimmik siunnerfilimmik massakkut iliuuseqarfigisariaqalerparput, Múte Bourup Egede oqarpoq.
Nunatta pisiassatut isigineqarnerata takutippaa Kalaallit Nunaanni suliassaqartugut, Nunanut Allanut Sillimaniarnermullu Ataatsimiititaliami siulittaasoq, Aleqa Hammond, oqarpoq.
- Uagut pisiassatuinnaq suleqatiginiakkatta isigippatigut, nunanut allanut oqaloqatiginnittarnerput toqqarnerusuusariaqarlunilu piumasaqarnerunissaa piffissanngorpoq. Kalaallit Nunaata, suna tamarmi Danmarkikkoornagu, nammineq pisinnaatitaaffigivaa nunat amerikatut ittut toqqaannarlugit isumaqatigiissuteqarfigissallugit, Nunanut Allanut Sillimaniarnermullu Ataatsimiititaliami siulittaasoq, Aleqa Hammond, oqarpoq.