Politikki

Mette Frederiksen: Isertitsiviit misissoqqissaarneqassapput

Folketingip Ombudsmandiata Nunatsinni isertitsiviit 2013-imi takuniareerlugit, taakkunani pinerluttunut atugassarititaasut isornartorsioreeraalu, danskit inatsiseqarnermut ministeriata, Mette Frederiksenip maanna piumasaraa, isertitsiviit Nunatsinniittut tamakkerlugit misissuiffigineqarnissaat.

Allattoq Apollo Jeremiassen

januaarip 14-at 2015 14:05

Tamanna pillugu Mette Frederiksen KNR-imut ima allappoq.

- Kulusuup isertitsiviani ajornartorsiutit assigiinngitsut, Folketingip Ombudsmandiata nalunaarutaani allassimasut, Inatsiseqarnermut ministereqarfimmit ullut 14-nit matu siorna tigusagut naapertorlugit, pissutsit maanna misissuiffigineqarnissaat aalajangiupparput.

- Folketingip Ombudsmandiata takuniaareernerata kingorna, isertitsivinni pissutsit atugassarititaasullu, Kalaallit Nunaanni Politimestereqarfimmit iluarsartuunneqartut ilisimalereeraluarpagut. Taamaattorli isumaqarpunga isertitsivinni pinerluttunut atugassarititaasut, inuit pisinnaatitaaffiinik tunngaviusunik atuutsitsisoqartariaqartoq.

Danskit Inatsiseqarnermut ministeriat, Mette Frederiksen allappoq.

Nunatta Inatsiseqarneq pillugu Naalakkersuisuiata, Mala Høy Kúko-p nuannaarutigaa, danskit Inatsiseqarnermut ministeriata, Mette Frederiksenip isertitsivinni pissutsit maanna misissortinnialermagit. Tamanna pillugu Inatsiseqarneq pillugu Naalakkersuisoq ima oqarpoq.

Aamma atuaruk Nunatsinni pinerlussimasunut isertitsiviit sakkortuumik isornartorsiorneqarput

- Danskit Inatsiseqarnermut ministeriata qanoq iliuuseqarniarnera utaqqiinnarallassavara. Kisianni periarfissaq siulleq atorlugu Inatsiseqarnermut ministerimut nalunaarutigissavara, pisup malinnaaviginissaa siunertaralugu.

Inatsiseqarnermut Naalakkersuisoq, Mala Høy Kúko KNR-imut taama oqarpoq.