Melania Trump: Præsidenti coronamut akiuiniarnermi sapinngisani tamaat iliuuseqarniarpoq
USA-p præsidentiata nulia, Melania Trump, USA-mi coronavirusimik toqquteqarsimasunut misiginneqatiginninnini oqalugiarnermini ingerlateqqippaa.
Præsidentip nulia, republikanerit præsidentimut qinersisoqarnissaanut atatillugu ataatsimeersuarneranni, præsidentip illorsuata Det Hvide Husip saavani oqalugiarpoq misiginneqatiginninnilu tassani ingerlateqqillugu.
- Asasaminnik annaasaqarsimasut tamarmik misiginneqatigingaarpakka. Napparsimasut perululuttullu qinnuppakka.
- Annilaangasut amerlaqisut, ilaalu ikiortissaqanngitsutut misigisimasut ilisimavara. Ikiortissaqarnerit ilisimassagit kissaatigaara, Melania Trump oqalugiarnermini aallaqqaasiullugu oqarpoq.
Akeraq takussaanngitsoq
Uiata, Donald Trumpip, coronavirusip nunarsuaq tamakkerlugu tunillaassuunneranit eqqugaasut tamarmik isumaginissaat sapinngisamik tamaviaarutigiumaarai, Melania Trump oqartoq, nutaarsiassaqartitsivik CNN allappoq.
- Nunatsinni inuuneq marsimili allanngoqisoq miserratiginngilara. Akeqqatta takussaanngitsup, covid-19-ip, nunarput ajalusoorterujussuarlugulu tamatta sunnerpaatigut, Melania Trump oqarpoq.
AAMMA ATUARUK Obama: Donald Trumpip præsidentiunini piviusulianik takutitsinertut isigaa
Tasssuma Trumpip allattoqarfianiittut sunniuteqarluartumik nakorsaasoqarsinnaalernissaanut imaluunniit kikkut tamarmik akiuussutissamik pissarsisinnaalernissaannut ilungersuuteqarlutik suliaqarnerminnik unitsitsinavianngitsut neriorsuutigaa.
Amerikamiut 178.000-it toqqutigisaannut, coronamut akiuiniarnermi sallersaallutik sulisut qujassuteqarfigai.
- Peqqinnissaqarfimmi sulisut sulisullu allat piffissami ilungersunartumi suliaqartut qujassuteqarfiniarpakka. Naak immissinnut ilaquttassinnullu aarlerinartorsiortitsigaluarlusi nunarput salliutipparsi. Tamanna pillugu uima uangalu qujamasuutigeqaassi, Melania Trump oqarpoq.
Oqalugiarneq pingaaruteqartoq
Melania Trumpip partiip 2016-imi ataatsimeersuarnerani oqaluarnerani pingaarutilimmik oqalugiarneranit marlunngornermi ataatsimeersuarnermi oqalugiarnera pingaaruteqarnerpaalersutut isigineqarpoq.
Uiata uissuumminarsinnaasunik ilaatigut oqaaseqartarsinnaanera oqalugiarnermini aamma illersorpaa.
AAMMA ATUARUK Michelle Obama: Donald Trumpip uivertitsinera Bidenip unitsissinnaavaa
- Nuannarigukku nuannarinngikkukkuluunniit Donald Trumpip isummani isertuanani annittaraa nalugunanngilarput. Præsidentitsitsinnit peqqusersuinnerusoqarnissaa naleqquppoq. Nuannarigukku nuannarinngikkaluarukkuluunniit qanoq eqqarsaateqarnera ilisimajuaannarpat.
- Piviusorsiortuugamimi, nunani innuttaasuilu asagamigit sullilluarnerorusullugillu, Melania Trump oqarpoq.
Republikanerit ataatsimeersuarnerat USA-mi ataasinngornermit marlunngornermut ingerlanneqassaaq.
USA-mi præsidentimut novembarip ulluisa pingajuanni qinersisoqassaaq.
