Michelle Obama: Donald Trumpip uivertitsinera Bidenip unitsissinnaavaa

USA-mi pæsidentiusimasup Barack Obamap nuliata Michelle Obamap USA-mi demokraatit præsidentimut qinigassanngortitassaannik toqqaanissamut ataatsimeersuarneranni oqalugiarnermini USA-p præsidentia Donald Trump saassutarivaa.

Michelle Obamap Donald Trump USA-mi præsidentitut tulluanngitsutut taavaa, amerikamiullu qinersisartui kaammattorpai novemberimi præsidentimut qinersisoqarpat siornatigut præsidentimut tullersortaasimasoq Joe Biden qinissagaat.

Donald Trumpip præsidentiunermini uivertitsinera Joe Bidenip unitsissinaagaa, MIchelle Obama isumaqarpoq.

- Amerikamiut præsidentip illorsuanut Det Hvide Husimut isigitillutik aqutsisumik neriuuteqartarput, kisianni uivernermmik, avissaartuunnermik misigissuseqanngiillunnartumillu præsidenteqarput.

- Donald Trump nunatsinni præsidentitut tulluutinngilluinnarpoq. Præsidentitut tulluunnerminik qularnaallisitsinissaminut piffissaqarnikooqaaq, qularnanngitsumilli ajornartorsiorluni, Michelle Obama oqarpoq.

AAMMA ATUARUK Joe Bidenip USA-p præsidentia ammit qalipaataannik assigiinngisitsisuuneraraa

Michelle Obamap Donald Trump coronavirusi USA-mi ukiup aallartinnerani siuaruaatileruttormat piaartumik iliuuseqarsimanngitsututut oqalugiarnermini oqaatigaa.

- Joe Biden ilisarisimavara. Præsidentimut tullersortaalluartorujussuunikuuvoq. Aningaasasiornikkut ajornartorsiortoqartillugu qanoq aaqqiisoqarsinnaanera ilisimalluarpaa, nunarsuaq tamakkerlugu tunillaassuunneq akiorsinnaavaa nunarpullu aqussinnaalluugu, Michelle Obama oqarpoq.

Joe Biden præsidentimut coronavirusip tunillaassuunnera pissutigalugu nittartakkakkut isiginnaarutit atorlugit ataatsimeersuarnermi qinigassanngortittussatut innersuunneqassasoq ilimagineqarpoq.