Meeqqerivitsialak aallartisarneqarpoq

Atuarfitsialak ukiuni arlalinni anguniarneqareersoq Meeqqerivitsialaqarnissaq maanna aamma anguniarneqalerpoq.

Meeqqerivitsialak aallarnisarniarlugu susassaqartut Ilulissani arfininngormat ataatsimeersuarput.

Meeqqerivitsialaap piviusunngortinneqarnissaa anguniarlugu ukiuni tulliuttuni pingasuni Meeqqerivitsialanngortitsiartuaartoqarnissaanut Ilinniartitaanermut pisortaqarfik KIIIP 6 mio. koruuninik aningaasaliivoq.

Ilulissanilu inuit 30-t sinnillit meeqqeriveqarnermi immikkut ilisimasaqarsorineqartut tamanna pillugu arfininngormat ataatsimeersuarput.

Perorsaanermik Ilinniarfiup rektoria Nuka Kleemann aperaarput, ataatsimeersuarnermi alloriarfissatut siullertut suut isumaqatigiissutaanersut.

- Isumaqatigiissutigineqarpoq Meeqqerivitsialak kiisami aallartinneqartariaqalersoq, qujanartumillu politikikkut tamanna tapersersorneqarpoq, Nuka Kleemann oqarpoq. Nangipporlu:

- 6 mio. koruunit immikkoortinneqarnikuupput, taakku atorlugit sinerissami ataatsimeersuartitsisarnerit oktoberimiit aallartittussat ingerlanneqartassapput. Taavalu aamma immikkut suliniutinut aningaasaliissutigineqartassapput, soorlu assersuutigalugu, ilisimatuussutsikkut misissuinernut, Nuka Kleemann oqarpoq.

Taanna nassuiaavoq allannguutitut erseqqissaatigineqarsimasut, meeqqat pinnguarneq atorlugu, ilaatigut oqaatsinik pinnguarneq aallaavigalugu, peroriartortinneqartassasut.

Nuka Kleemann aamma erseqqissaavoq, atuarfiit meeqqeriviillu ataqatigiissarneqarneranni pingaartinneqartoq, meeqqeriviit atuarfinnut piareersarfittut isigineqannginnissaat, meeqqat meeqqatut meeraatinnissaat pingaartinneqarmat. Nuka Kleemann erseqqissaavoq, sinerissami isumasioqatigiinnerit oktobarimi aallartinneqassasut ukiullu ingerlanerani, upernaaq tikillugu, isumasioqatigiittoqartassasoq.