Meeqqerivimmiititsilernissamut utaqqisut ikilisinniarneqartut
- Ukiut ingerlanerini utaqqisut amerliartuinnarput, Qaasuitsup Kommuniani ulluunerani neqeroorummi, kultureqarnermut sunngiffimmilu fagchefi, Else Marie Ravnshøj Johansen, oqarpoq.
Qaasuitsup Kommuniani meeqqerivinniittuutitaqalernissamut utaqqisut amerlanerpaapput. Tassani utaqqisut 210-upput.
AAMMA ATUARUK Meeraaqqerivimmut inissamik ukioq ataaseq sinnerlugu utaqqisariaqartut
Ajornartorsiuulli kommunip kultureqarnermut, atuartitaanermut sunngiffimmullu ingerlatsiviata sivisuumik eqqumaffigigaa.
Kommunimi illoqarfiit annersaanni marlunni utaqqisut amerlanerpaapput, taakkulu ikilisinnissaannut aningaasaliinissaq politikerit akuersisimasut, fagchefi oqarpoq.
- Meeqqerivinnik marlunnik, ataaseq Aasianni ataaserlu Ilulissanilu tamarmik meeqqanik 44-nik inissalinnik oktobarimi ammaassaagut, Else Marie Ravnshøj Johansen oqarpoq.
AAMMA ATUARUK Qaasuitsup Kommuniani meeqqerivinnik sanaartortitsiniarput
Tamannalu iluaqutaasussaagaluartoq suli pisariaqartitsisoqartoq.
- Ilulissani sukkanerpaamik sanaartortoqarnissaa suli pisariaqartipparput, Johansen oqarpoq.
Nunatsinni meeqqerivimmiititsilernissamut utaqqisut katillutik 369-iupput.
Qaasuitsup Kommuniani utaqqisut saniatigut Kommuneqarfik Sermersuumi utaqqisut 71-iupput, Qeqqata Kommuniani 37-ullutik Kommune Kujallermilu 51-iullutik,.
AAMMA ATUARUK Pingaeqqad isumalluartitsivoq
Kommune Kujallermili utaqqisut aamma ikilisinneqarniarput.
Kommunip illuutaata meeqqerivittut namminersortutut siornatigut atorneqarsimasup kommunimit atorneqalernissaanut periarfissarsiortoqartoq, kommunip meeqqeriveqarnermut ataatsimiititaliaata siulittaasua, Jørgen Wæver Johansen oqarpoq.
- Taamatullu illutaa atorluarlugu taamaalillutalu meeqqanut amerlanerusunut inissaqartitsinissarput ujartorniarparput, Jørgen Wæver Johansen oqarpoq.