Meeqqat pisinnaatitaaffitik ilisimasariaqarpaat
Kinguaassiutitigut atornerluinerit, persuttaasoqartarnera, inuunerlu hashimik imigassamillu atuiffiusoq. Naalagaaffiit Peqatigiit Meeqqat pillugit isumaqatigiissutaat naapertorlugu meeqqat inuusuttullu tamakkununnga naalagaaffimmit illersugaasussaapput. Nunatsinnili taamaaliortoqanngilaq, MIO-p nalunaarusiaani nutaami tamanna atuarneqarsinnaavoq.
Nalunaarusiami inerniliineq naapertorlugu Meeqqat pillugit isumaqatigiissummi artikelinit 54-iusunit artikelit 20-t nunatsinni eqquutsinneqanngillat. Nunarput isumaqatigiissutip malinnissaanut ukiut 25-it sinnerlugit matuma siorna imminut pisussaaffileraluartoq taama inissisimasoqarpoq.
AAMMA ATUARUK Meeqqat pillugit Isumaqatigiissut nunatsinni suli eqquutsinneqanngilaq
21-nik ukiullip Sikkerninnguaq Olsenip Nakuusami Meeqqat Isummersorfiannut 2011-mit 2016-imut ilaasortaasup tupaallaatiginnginerarpaa.
- Tupaallannarpallaanngilaq. Tamakkumi aamma Nakuusami ukiut arfineq-marluk matuma siorna eqqartortarpagut. Ajornartorsiutilli iliuuseqarfigineqarsimannginnerat tupaallannarpoq, Sikkerninnguaq Olsen oqarpoq.
Kinguaassiutitigut atornerluinerit imminullu toquttarneq isummersorfimmi ilaasortaanermini eqqartornerusarsimallugit Sikkerninnguaq Olsenip oqaatigaa. Tamakku sammissallugit paqumigineqakkajuttarmata iliuuseqarfigiuminaattarsimapput.
AAMMA ATUARUK MIO-p meeqqat pisinnaatitaaffii aallakaatitassiarissagai
- Uagut isummersorfimmiittugut meeraagaatta tamakku eqqartussallugit ilungersuutigisarparput. Inuiaqatigiinnilu meeqqanit oqaluuseritinnissaat unammilligassat tullerissavaat. Sammismmi paqumigineqartupilussuupput.
Sikkerninnguaq Olsen maanna inersimasuugami meeqqat isummersorfianni ilaasortaajunnaareerpoq. Taamaattorli aaqqiissutaasinnaasumik siunnersuutissaqarpoq:
- Meeqqat pisinnaatitaaffeqarlutik namminneq ilisimasariaqarpaat. Aamma akisussaasut, pisortat angajoqqaallu suut akisussaaffiginerlugit paasisariaqarpaat, Sikkerninnguaq Olsen oqarpoq.
AAMMA ATUARUK Skolelærer glad for MIO's nye bog om opdragelse
Nunatsinni meeqqat inuusuttullu akornanni ajornartorsiuterpassuit, naalakkersuisut nikeraattarnerat apeqqutaatinnagu piffissaq ungasinnerusoq eqqarsaatigalugu politikkikkut aaqqiissuteqarfigineqartariaqartoq, Meeqqat illersuisuat Avaja Egede Lynge taama isumaqarpoq.
