Meeqqat pisartagaat kalaallinut qulakkeerneqarput
- Meeqqat tamavimmik, qimaasut meerartarigaluarpatsigit imaluunniit savalimmiormiut kalaallilluunniit meerartarigaluarpatsigit meeqqanut tapisiissutinik pisartagaqalissapput, isumaginninnermut naalakkersuisoq Karen Hækkerup ullumi tamaatut oqarpoq.
Ukiut marluk Danmark-imi najugaqareernermi meeqqanut inuusuttunullu tapiissutit tunniunneqartarnissaannik maannakkut naalakkersuisuusut siuliisa atuutilersitaat allanngortinneqarpoq, maannakkut Enhedslisten peqatigalugit isumaqatigiissuteqarnermi meeqqat tamarmik tapiiffigineqartalernissaat anguneqarpoq.
Meeqqanut tapiissutinut inatsimmi maannakkut atuuttumi savalimmiormiut kalaallillu eqqugaapput naak danskisut innuttaassuseqaraluartut.
Meeqqanut tapiissutit tunniunneqartarnerinut inatsimmi equngasoqarnera iluarsiiveqqulugu
IA sinnerlugu folketingimi ilaasortaq Sara Olsvig danskit akileraartarnermut minisiteriannut ukiormanna saaffiginnippoq.
Meeqqanut tapiissutit aaqqissuut nutaaq pillugu, isumaginninnermut ministerip Karen Hækkerup-ip tunngavilersuutaanut ilaavoq, atuagaasiviit kamippaallu ukiorsiutit akii assigiimmata, danskinik nunanit allamiunilluunniit angajoqqaaqaraluaraanni.
Isumaqatigiissuteqarneq Enhedslisten-imit nuannaarutigineqarpoq.
-Kiisami aningaasaqarnermut inatsisit iluatsinnialerpoq, nunanit allamiuuneq pissutigalugu Pia Kjærsgaard-imit isornartorsiorneqarnissamik ernummateqarata, Johanne Schmidt-Nielsen Enhedslisten-imeersoq oqarpoq.