Meeqqat inuusuttullu 2024-mi 935-t angerlarsimaffiup avataanut inissinneqarput

Tamanna isumaqarpoq ukioqanngitsuniit 23-nik ukiullit akornanni innuttaasut tamarmiusut 5 procentingajaannik amerlassuseqartut inissinneqarput. Piaartumik iliuuseqartoqarnissaa pisariaqartoq, meeqqanut inuusuttunullu naalakkersuisoq Mariane Paviasen Jensen isumaqarpoq.

Allattoq Jonna Enoksen Dahl

maajip 08-at 2026 16:31

Meeqqat inuusuttullu angerlarsimaffiup avataanut inissinneqartarnerinut aaqqiissutissamik nassaartoqartariaqarpoq.

Innuttaasut ukioqanngitsuniit 23-t tungaannut ukiullit tamarmiusut 5 procentingajannik amerlassuseqartut angerlarsimaffiup avataanut 2024-mi inissinneqarsimapput. Danmarkimut sanilliukkaanni, meeqqat inuusuttullu inissinneqarsimasut 1 procentiinnaapput.

Tamanna meeqqat inuusuttullu inissinneqartarneri pillugit aningaasartuutinut misissueqqissaarnermit Deloittep 2025-mi nalunaarusiaata takutippaa.

Misissuineq naapertorlugu nunatsinni meeqqat inuusuttullu 2024-mi 17.878-iusut naatsorsorneqarput, taakkunanilu 935-t angerlarsimaffiup avataanut piffissami sivikinnerusumi sivisunerusumilu inissinneqarput.

Meeqqanut inuusuttunullu naalakkersuisoq, Mariane Paviasen Jensen tusagassiortunut tallimanngornermi maajip arfineq pingajuanni sassarami meeqqat inuusuttullu inissinneqartarnerinut aningaasartuutinik misissueqqissaarnermi inernerit saqqummiuppai.

- Meeqqanik arsaartuineq unittariaqarpoq. Pissutigalugu taamatut ingerlaannaraluarutta inuiaqatigiittut annertoorujussuarmik ikilerneqarnerput suli alligaluttuinnassammat, naalakkersuisoq, Mariane Paviasen Jensen KNR-imut oqarpoq.

Deloittep misissuinera naapertorlugu meeqqat inuusuttullu angerlarsimaffiup avataanut 2024-mi inissinnerannut aningaasat 699,6 millionit koruunit atorneqarput.

Inissiinernut pissutaasut

Inissiinermi pissutaasut	Nukappiaqqat	Niviarsiaqqat	Katillugit
Isumassorneqarnissamut sumiginnaaneq	57%	49%	53%
Atornerluineq (angajoqqaat)	11%	14%	12%
Angajoqqaatut piginnaasakippallaarneq	7%	10%	9%
Meeqqamut nakuuserneq	7%	6%	7%
Kinguaassiuutitigut qaangiinerit	3%	5%	4%
Inissaaleqineq	4%	3%	3%
Peqqissutsikkut ilungersunartut (meeraq/inuusuttoq)	2%	5%	3%
Angerlarsimaffimmi nakuuserneq	5%	1%	3%
Pissutsit ernumanartut (meeraq/inuusuttoq)	2%	4%	3%
Allat	2%	1%	2%
Atornerluineq(meeraq/inuusuttoq)	0%	2%	1%

Paasissutissaq: Meeqqat inuusuttullu inissinneqartarneri pillugit aningaasartuutinut misissueqqissaarneq pillugu Deloittep nalunaarusiaa

Tassalu Nunatta karsiata 2024-mi isertitassaatut missingiussat 8 milliarderluinnaammata, meeqqat inuusuttullu angerlarsimaffiup avataanut 2024-mi inissinnerannut nunatta karsiata aningaasaataasa 8,7 procentii, imaluunniit koruunit aqqaneq marluugaangata ataaseq, atorneqarput. Kisitsisit atorneqartut KNR-ip nammineq kisitsinermini nassarai.

Meeqqalli inuusuttullu angerlarsiaffimmiit qimagutinneqartarnerat massakkut iliuuseqarfigissallugu ajornakusoortoq naalakkersuisup Mariane Paviasen Jensenip aamma oqaatigaa, kommunilli siullertut suleqatigerusuppai.

- Pisariaqartippara kommunip ilisimasaa sumeeqqissaarnersoq paasissallugu, tassanilu alloriarnerit ingerlaqqinnissatsinnut sakkussatut tigujumaaratsigit. Neriuppunga piffissap sivisuallaanngitsup ingerlanerani aaqqiissutaasinnaasunik sulianik pitsanngorsaataasinnaasunik nassaassalluta, uanga pingaartittorujussuuara angajoqqaat siusissukkut ikiorneqartarnissaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.