Tasiilamiut: Meeqqat inuusuttuaqqallu pitsaanerusumik ikiorneqartarnissaat salliunneqarli

Tasiilami meeqqanut innarlernartumik pisoqarsimatillugu ilaqutariit saaffissaleqisaarput. Kommuneqarfik Sermersuumit upernaaq iliuuseqartoqaraluarpoq, Tasiilarmiulli allannguutaasinnaasunik malugisaqarsimanngillat.
Meeqqamut kinguaassiuutitigut atornerlunneqarsimasumut anaanaasoq Naasunnguaq Ignatiussen Streymoy iliuuseqarpoq. Assi © : KNR/DR
Meeqqamut kinguaassiuutitigut atornerlunneqarsimasumut anaanaasoq Naasunnguaq Ignatiussen Streymoy iliuuseqarpoq. Assi © : KNR/DR
Allattoq Ane-Marie Petersen
novembarip 07-at 2018 11:56

Ikiortissanik pitsaanerusunik ujartuilluni Tasiilami atsiornermik katersisoq Naasunnguaq Ignatiussen Streymoy oqarpoq.

Meeqqat ikiorneqassappata napparsimmavik, kommuni saaffissaasinnaasullu allat naammanngillat. Meeqqamut kinguaassiuutitigut atornerlunneqarsimasumut anaanaasoq Naasunnguaq Ignatiussen Streymoy oqarpoq.

- Panima pisortanit ikiorserneqarnissaanut saaffiginnittaraluarluta ikiorneqartutut misigineq ajorpunga. Politiit napparsimmavillu kommunimut nalunaarusiortinnikuugaluarpakka, meerarali  ikiorneqanngilaq.

Anaanaasup politikerinut iliuuseqaqqusinera Tasiilami innuttaasut 300-t sinnilaarlugit taperserlugu atsioreerput, sulilu atsiortoqartarpoq.

AAMMA ATUARUK Tasiilami meeqqat inuusuttuaqqallu sumiginnagaanerat ajorluinnarpoq

AAMMA ATUARUK Tasiilami meeqqanik inuusuttunillu sullissisussaaleqisut

Kommunimit iliuuserineqartut malugineqanngitsut

Tasiilami ukiuni arfinilinni ilinniartitsisuusimasoq Rikke Blegvad upernaaq taamatinnerminut atatillugu aamma Tasiilami ajornartorsiutit sakkortuumik uparuartorpai.

Kommunilu ilungersorneroqqullugu piumasaqartut atsiornerannik Kommuneqarfik Sermersuumut tunniussiartorpoq.

- Meeqqat inuusuttullu angajoqqaaminnut angajoqqaarsiaminnulluunniit angerlarusunngitsut atuarfimmi nalaattarpagut, ilaatigullu misigisarparput kommunimut attaveqaraluarluta akisoqanngitsoq, ajornerpaatillugulu kommunip ikiorumanata atuarfiliarsinnaannginerartut aqqusaarnikuuagut, Rikke Blegvad KNR-imut upernaaq oqarpoq.

Kommuneqarfik Sermersuumi aaqqissuusseqqittoqartoq, Tasiilamilu meeqqanut ikiorneqartarialinnut suliat katersorneqartut, Meeqqanut Ilaqutariinnullu ingerlatsivimmi pisortaq Martha Lund Olsen upernaaq oqarpoq.

Tamanna Tasiilami Nuummilu isumaginninnermik siunnersortit ikioqatigiinnerisigut pissaaq.

Kisianni kommuni taamaalioraluartoq, Tasiilami allanngortoqarneranik malunnartoqanngitsoq, Naasunnguaq Ignatiussen Streymoy oqarpoq.

- Meeqqat, inuusuttuaqqat ilaqutaallu immikkut ilisimasalinnit ikiorneqartalernissaat pingaarnersiorneqartariaqarpoq, Naasunnguaq Ignatiussen Streymoy oqarpoq.

Tasiilami isumaginninnermut immikkoortortaqarfimmi unammilligassaqartoq Borgmester Asii Chemnitz Narupip nassuerutigaa. Napparsimmaveqarfiit, politiit kommunilu ikioqatigiinnerusinnaanerat KNR-imut oqaatigaa.

Aamma atuaruk