Meeqqat inuunerissunut 10 millionit

Danmarkimi Villum-ip aningaasaateqarfiata nunatsinni peqatigiiffik Meeqqat Inuunerissut, 10 millionit koruuninik tunissuteqarfigaa.
Allattoq Mads Lynge
januaarip 24-at 2012 06:10

Aningaasat suliniummut "Kuseriarnerup Siaruarneratut" taaguutilimmut, ukiuni pingasuni suliniutigineqartussamut atorneqassapput. Suliniut Nunatsinni meeqqat kinguaassiuutitigut atornerlunneqarnissaannut pitsaaliuinermik siunertaqarpoq.

Aningaasaliisoqarneratigut suliniutip ukiuni pingasuni ingerlaannarnissaa taamaalilluni qulakkeerneqartoq, peqatigiiffik Meeqqat Inuunerissut nalunaarput.

- Pilersaarutitta piviusunngortinneqarnissaa aningaasat qulakkeerpaat, pilersaarullu pitsaasumik pimoorullugu piareersarlugulu piviusunngortinniarnissaa maanna aallussinnaanngorparput, peqatigiiffimmi Meeqqat Inuunerissut-mi siulersuisuni siulittaasoq, Line Frederiksen, unnersiorpoq.

Suliniummi millionerpassuarnik tapiiffigineqartumi innuttaasut soqutiginnittut tamarmik maligassiuisutut sungiusarneqarnissaannut aningaasat atorneqassapput.

Maligassiuisutut sungiusarneqarsinnaaneq upernaaru aallartissinnaanngussaaq, tassami sinerissami illoqarfiit assigiinngitsut qulit peqatigiiffiup tikeraassammagit.

Peqatigiiffik Meeqqat Inuunerissut nuna tamakkerlugu siorna katersuiniarnersuarmi 1 millionit koruunit sinnerlugit isertinneqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq