Meeqqat Ilulissani qimussimik sukkaniunnissamut piareertut

Qillaq Hermarij og Maybrit Thorin Nielsen meeqqat Avannaata Qimussersuaaraani Ilulissani aqagu sukkaniunneranni peqataasussaapput.

Taakkulu unamminissaminnut pissanngapput.

- Aallaleraangatta pissangalaartarama, immaqa taamatupajaaq, piareersimalaarpunga, Qillaq Hermarij oqarpoq.

Taanna kingullermik ukiut marluk matuma siorna Qasigiannguani unammisoqarmat ajugaavoq, taassumalu ukioq manna aamma angusarissaarnissani naatsorsuutigaa.

- Normu 6-ullunga aallartittussaavunga, ilaqussitinngikkumami ajorunnanngilaq, ajorpallaassanngilaq aqqutaa, taanna oqarpoq.

Maybrit Thorin Nielsen Qillaq Hermarijip saannguani inissisimassaaq. Taannami normu 5-iulluni aallartussaavoq. Inissisimaffissarlu taanna kissaatigisimavaa.

Uluai qerisut

Peqataasussat marluk unamminissaminnut piffissaq sivisujaartoq silalu qanoq ikkaluaraangat sungiusartarsimapput.

Qillaq Hermarij qaammat kingulleq sungiusarluni aallartippoq, Maybrit Thorin Nielsenilu aatanilu sila qanorluunniit ikkaluaraangat aamma persersumi sungiusarsimavoq.

- Ikaarpunga sangulivinninni uluakka qeripput qeringajallutik, kisianni qeripput ugguuna ugguunalu. Taava uterama aataga oqarpoq qeripput uluatit, taava uanga maluginagit. Uteratta uunnasserpakka, taanna oqarpoq.

Aallartiffissatullu kissaatigisarluinnaqqissaaminit aallartittussaagami pitsaanerit pingasut akornanniinnissani naatsorsuutigaa.

- Eqqoriarpara 3-nngussasunga 2-luunniit, qilanaaraara assorujuk, Maybrit Thorin Nielsen oqarpoq.

Maybrit Thorin Nielsen aamma Qillaq Hermarij qimmillu meeqqat allat qimmiinit sukkanerutinniarlugit sukkatsisartarnissaannut ilioriaaseqarput. Taakkuli namminneq isertugaatigiinnarniarpaat.

- Immaqa aataaqqama oqaqqujunnanngilaanga, Qillaq Hermarij isertukujulluni oqarpoq.

Meeqqat qimussimik sukkaniunnerat aqagu nalunaaqutaq ataatsimut aallartissaaq, peqataasussallu taakku marluk isertugaataat iluaqutaassanersut piffissap takutikkumaarpaa.