Meeqqat illersuisuat nersornaaserneqalersoq

Dronning Margrethe Ebbe Munckip nersornaasiuttagaanik ukioq manna nersornaasiiguni meeqqat illersuisuat, Aviâja Egede Lynge, MIO-meersoq nersornaaserneqassaaq.

Ebbe Munchip eqqaassutissaatut aningaasaateqarfik tusagassiuutinut nalunaarummi allappoq.

Nersornaat ataqqinaasiinermik nersornaataasoq Ebbe Munchip soqutigisaqarfigisaanik suliaqartunut tunniunneqartarpoq, aningaasaateqarfik allappoq.

Ebbe Munch tusagassiortuuvoq, sorsuutiginnittuuvoq, aallartitaavoq kunngissallu allaffeqarfiani pisortaalluni.

Ebbe Munchimut assigiissuseqartoq

Nersornaat aningaasaateqarfik naapertorlugu Aviâja Egede Lyngep Ebbe Munchip qanoq ittuusimaneratut iliuuseqartarnera pissutaavoq, tassa innarligassaanngitsumik paasisimasaqarluartumik iliuuseqartartoq, taannalu eqqortuusorisaminik naleqquttuusorisaminillu isumaqaraangami oqaaseqarlunilu iliuuseqartarpoq.

Nersornaat ataqqinartorsuarmit Dronningimit Christiansborg Slotimi novembarip 14-ianni tunniunneqassaaq, meeqqallu illersuisuata nunatsinni meeqqanut inuusuttunullu tunngatillugu suliaqarneranut aamma tunniunneqassalluni.

- Meeqqat inuusuttullu atugaat tamatsinnut sunniuteqartarneranik paasisimasaqarnissamik siammarterisinnaammat. Politikkikkut aalajangiisartut oqaluuserinniinnaratik meeqqanut inuusuttunullu inuuniarnermikkut ajornartorsiuteqartunut pissutsit pitsaanerulersinneqarnissaannut aamma iliuuseqartinniarnissaannut sapiissuseqarpoq, tusagassiuutinut nalunaarummi allassimavoq.

2015-imi meeqqanut illersuisunngorluni MIO-mi siuttuuleraminili sammisaq taanna sulissutigilerpaa.

Aviâja Egede Lynge nersornaammik 1975-imi pilersinneqartumik nersornaaserneqaruni Ebbe Munchip nersornaasiuttagaanik bronzemik nersornaaserneqassaaq.