Meeqqat angerlarsimaffiup avataanut inissinneqartartut amerliartorput
Inatsisartuni pingasunngornikkut akunneq apeqquteqartarfimmi Ilaqutariinnermut Naligiissitaanermut Isumaginninnermullu Naalakkersuisoq, Martha Lund Olsen, akissuteqarnermini taama erseqqitsigisumik oqarpoq.
Ilaqutariit meerartallit ajornartorsiuteqartut kommunini arriippallaamik sullinneqartarnerat, angajoqqallu imigassamik ikiaroornartumillu hashimik atornerluinerat pissutigalugu, meeqqat angerlarsimaffiup avataanut inissinneqartarput.
- Aajuusaarnarpoq, soorunami meeqqat angerlarsimaffeqartariaqarput toqqissisimaffiusuni, pisariaqarani angerlarsimaffiup avataanut inississallugit, meeqqat illersugassaaraagut, kisianni ajoraluartumik angerlarsimaffiup avataanut inissiissoqartariaqarluni, Isumaginninnermullu Naalakkersuisoq, Martha Lund Olsen, taama oqarpoq.
Aamma atuaruk Suliniuterpassuit pissutigalugit angerlarsimaffiup avataanut inissinneqartartut amerleriartut
Martha Lund Olsenip naalakkersuisoqarfiani kommunit isumagininnikkut, pingaartumillu meeqqat inuusutullu sullinneqarnerat, nakkutigineqarput taakkuali suliassaminnik naammassinninngitsut sukateriffigineqassapput.
- Meeqqanut inussuuttullu kommunit isumaginninnermut sullissiviini sivisuallaamik uninngasarput, taamaattumik ajornartorsiutit siusinnerusukkut suliarineqarsinnaagaluartut pinngitsoortarput, ajornartorsiullu annertuallaalersimappat meeqqap angerlarsimaffiup avataanut inissinneqartariaqarluni, Martha Lund Olsen oqarpoq.
Ikiaroornartoq imigassarlu
Angajoqqaat ikiaroornartumik imigassamillu atornerluinerat meeqqanut kingunerluttarpoq.
- Imigassamik ikiaroornartumillu atornerluineq angerlarsimaffinni ajornartorsiuteqarnermi, meeqqallu angalarsimaffiup avataanut inissinneqartariaqarnerannut qitiusorujussuuvoq, Martha Lund Olsen oqarpoq.
Katsorsaanerit
Peqqinissaqarfiup akeqanngitsumik katsorsaanermik neqerooruteqalernissaa Isumaginninnermut Naalakkersuisup, Martha Lund Olsenip, isumalluarfigaa:
- Peqqinnissaaneqarfimmit neqeroorutigineqartussaq akeqanngitsumik atornerluisunut katsorsaanerit atuulluarileriarpata ilaqutariinnut sullissivinni nanginneqartassaaq oqaloqatiginnittarnikkut, taamaaliornikkullu meeqqat angerlarsimaffiup avataanut inissinneqartartut pinnginngitsoortinneqarlutik, Martha Lund Olsen oqarpoq.
Meeqqat 642-t 2014-imi angerlarsimaffiup avataanut inissinneqarput. Angerlarsimaffiup avataanut inissiisarneq nunatta karsianut ukiumut 300 millionit koruunit missaanik aningaasartuutaasarput.
Aamma atuaruk Qaasuitsup Kommuniani inissitat ikiliartortut
