Meeqqat angerlarsimaffiup avataanut inissinneqartartut ikilisarneqassapput
1994-imi saqqummersinneqarput meeqqat inuusuttullu arsaarinnissutigineqartartut misissorneqarsimanerisa inerneri, takuneqarsinnaalluni 1992-mi meeqqat 9-nit 17-nut ukiullit 4,3 procentii angerlarsimaffiup avataanut inissinneqarsimasut. 2006-mi kisitsit taanna imaalivoq, meeqqat inuusuttullu 6 procentii angerlarsimaffiup avataanut inissinneqarsimallutik.
-Qaffariaat sumiginnaanerit amerlisimanerannik tunngaveqarsorinngilara. Inuiaqatigiinni ajortoqartillugu takunninnissarput pikkoriffiginerulersimavarput, aamma misissuineq siulleq ingerlanneqarneranitulli taquminartutut isigineqartiginngilaq. Atuarfinni ilinniartitsisut atuarfimmi nalaattakkaminnik pitsaanerusumik isumaginninnissaannut ilinniartissimavagut, aamma isumaginninnermi oqartussaasunut innuttaasunit aarlerisunit saaffiginnissutit amerlisimapput. Aatsaat ulloq taanna saaffiginnittoqartarunnaarpat naammaginarsissaaq, Justus Hansen knr.gl-imut oqarpoq.
Demokraatit isumaqarput, angajoqqaat – nammineq piumassutsiminnik imaluunniit nammineq piumassuserinngisaminnik – arsaartittut iliuusissanut pilersaarusiuunneqartariaqartut aallaavigalugit angajoqqaajusoq imaluunniit angajoqqaajusut. Ilaannut katsorsartinneq iluaqutaasinnaavoq, allanullu imaasinnaavoq tarnikkut katsorsarneqarnissaq pisariaqartoq. Aamma allanut pisariaqartinneqartoq allarluinnaasinnaavoq sulissutigineqartariaqartoq.
-Iliuusissatut pilersaarutinik taama ittunik suliaqarnissamut inuiaqatigiit aningaasarpassuit atussavaat, inuusuttulli assersuutigalugu ilinniakkamik aallartitsisinnerisigut aningaasat taakku amerlanerusunngorlugit utertinnissaat qularutiginngilara. Taamatut pisoqartillugu aningaasanit killilersorneqassanngilagut, sukkanerpaamilli iliuuseqartariaqarluta. Taamaaliornikkut inuusuttut ukioqatigiikkuutaat amerlanerpaartaasa sulilersinnissaat pisortanillu ikiorsiissutinik pilersugaannginnissaat aamma qulakkiissavarput. Naggataatigullu tamanna nunatta karsianut aningaasanik isaasoqalerneranik kinguneqassaaq, Justus Hansen Demokraatit tunuliaqutaralugit qinigassanngortittoq oqarpoq.
