Meeqqat angerlarsimaffianni Godhavnimi najugaqarsimasuni 17-it taarsiiffigineqassasut

Sjællandip avannarpasissortaani meeqqat angerlarsimaffianni Godhavnimi najugaqarsimasuni 17-it isumaqatigiinniareerlutik, paarinerlugaasimanertik pillugu 300.000 koruuninik taarsiiffigineqarnissaminnut akuerisaapput. Inunnik ikiuiniaqatigiiffik, Børns Vilkår, taama ilisimatitsivoq.

Mette Frederiksen (S) ministeriuninngoqqammerluni Danmarkimi ministeriusuni meeqqat angerlarsimaffiini 1960-ikkut 1970-ikkullu akornanni najugaqarsimasut ilarpaalui paarinerlugaasimanerannut utoqqatseqqaartooreersorlu, meeqqat angerlarsimaffianni Godhavnimi najugaqarsimasuni 17-it eqqartuussisunut danskit naalagaaffianit sassartitaapput.

AAMMA ATUARUK Nukappiaqqanut Godhavnimiissimasunut utoqqatserpoq

- Inuit taakku sinnerlugit soorunami nuannaaqaagut. Danskillu naalakkersuisui taama pisoqarsimaneranut utoqqatsernerat suliallu eqqartuussivinnut suliassanngortinnagit aalajangiiffigineqarnerat aamma nuannaarutigaarput.

- Suliat taamaattut naammassiniaruusaarneqarsinnaasartut, nungullarnarsinnaasartut kingunerlutitseqqissinnaasartullumi ilisimavarput, Børns Vilkårip pisortaa Rasmus Kjeldahl allappoq.

Meeqqat misiligaataasimasut utoqqatserfigineqartut

Meeqqat angerlarsimaffianni Godhavnitut ittumi najugaqarsimasut atugarliortitaallutillu kinguaassiuutitigut atornerlunneqartarsimasut sivisuumik ilisimaneqanngilaq. DR-illi taakku pillugit piviusulersaarusiaani 2005-imi aallakaatippaa.

Godhavnimi ukiut qulikkuutaat ingerlaneranni najugallit timikkut tarnikkullu sumiginnagaasimasut, nakorsaatinik misiligaataasimasut kinguaassiuutitigullu atornerlugaasarsimasut, danskit isumaginninnermut ministereqarfiata 2010-mi nalunaarusiortitaani erserpoq.

Kalaallit meerartaat misiligaataasimasut aamma utoqqatserfigineqarput - taarsiiffigineqaratilli. 

AAMMA ATUARUK Meeraanermi misileraataasimasoq: Nunarput aamma utoqqatsertariaqarpoq

Danskit ministeriunerata taakku nunatsinni ilaquttaminnit 1951-imi avissaartitaasimanerannut decembarimi utoqqatserfigai. 

Kalaallit meerartaat taakku Danmarkiliaanneqarlutik Red Barnetip siuttuuffigisaanik misiligaataapput.

Meeqqat taakku danskinngorsarnerunissaat siunertaasimavoq, taamaalillutik maligassiuisunngorsimallutik nunatsinnut uterumaarmata. Meeqqalli angerlamut uteramik oqaatsitik puiorsimavaat ilaquttaminnilu najugaqarsinnaanatik. Meeqqallu angerlarsimaffiannut inissinneqarput.

Namminersorlutik Oqartussalli meeqqanut taakkununnga utoqqatserusunngillat.