Paasisimasalik: Meeqqanut inuusuttunullu katsorsaavik pisariaqartinneqarpoq
Nunatsinni meeqqat amerlavallaartut kinguaassiuutitigut atornerlunneqartut ilisimaneqarpoq.
- Atornerlugaaneq pillugu saaffigineqartarama, Ulrikka Holm taama oqarpoq, iliuuseqartoqarnissaalu kissaatigalugu oqaatigalugu.
- Atornerlugaasimasut nunatsinni katsorsaaveqarnissaat pisariaqartutut isigivara, Ulrikka Holm oqarpoq.
Meeqqat kinguaassiuutitigut atornerlunneqartut tarnimikkut kingunerlutsitsinerminnik ikiorneqanngitsut inersimasunngoraangamik ilaatigut imigassamik ikiaroornartumillu atornerluisalersinnaasut, Ulrikka Holm oqarpoq.
AAMMA ATUARUK Ny børnelov skal gøre det enkelt for kommunerne
Oqaluuserineqartupilussuusoq
Meeqqat kinguaassiuutitigut atornerlunneqarsimasut ikiorneqarnissaasa ukiuni kingullerni oqaluuserineqartupilussuunera, taassuma nuannaarutigaa, ikiuinissamullu pitsaasunik iliuuseqartoqalereertoq oqaatigalugu.
- Rejseholdeqarnikuunera iluaqutaavoq. Kisianni nunatsinni ataannartumik katsorsaaveqarnissaa pingaaruteqarsoraara. Taanna katsorsaavik saaffigineqarsinnaassasoq, Ulrikka Holm oqarpoq.
Ataavartumik katsorsaavimmi ilaatigut meeqqat ilaquttatik ilagalugit gruppimi oqaloqatigiinnikkut peqqissarneqartassapput. Meeqqallu killissaat pineqartillugit ilagisaqarnissaat pisariaqartoq, Ulrikka Holm isumaqarpoq.
- Pingaaruteqarpoq, angajoqqaat peqataanissaat. Taavalu aamma meeqqap atornerlugaasimasup ikiorneqarnerata ataavartumik ingerlanneqarnissaa, Ulrikka Holm oqarpoq.
AAMMA ATUARUK Meeqqat kinguaassiutitigut atornerlunneqarsimanerartut pimmatigineqartut
Sulisussat amigaataasut
Naalakkersuisut atornerlunneqarsimasut atornerluisimasullu pillugit katsorsaanissamik pinaveersaartitsinissamillu iliuusissanik pilersaaruteqartut isumaginninnermut naalakkersuisoq, Sara Olsvig (IA) Sermitsiamut oqarpoq.
Meeqqat ikorfartorneqarnissaannut inatsit 2017-imi akuersissutigineqarpoq, taannalu atorlugu kommunit isumaginnittoqarfii pisariaqartitaminnik ikorfartorneqarsinnaassasut, Sara Olsvig isumaqarpoq.
Ulrikka Holmili naapertorlugu ajornartorsiutit inatsisiniinngillat.
- Nunatsinni kusanartunik inatsiseqarpugut. Kisianni sullissineq equngasumik ingerlasarpoq, sulisussat amigartarmata, atoqatigiinnermut tunngasunik immikkut ilinniagalik, Ulrikka Holm oqarpoq.
AAMMA ATUARUK Meeqqanut inatsit iluaqutaassaaq aningaasartornarnerussallunili