Meeqqat kinguaassiutitigut atornerlunneqarsimanerartut pimmatigineqartut

Kommunip atuarfeqarfiini pimmatiginninneq ajornartorsiutaangaatsiarpoq. MIO-p apriilip naanerani maajillu aallartinnerani tikeraarnerminut nalunaarusiaani meeqqat oqaluttuarisaannit pimmatiginninnerup timimut aserorterineranut assersuutit arlaqartut atuarneqarsinnaapput.

- Niviarsiaqqat ilaat oqaluttuarpoq unatarneqartarluni, pualanerarneqartarluni patittaasersortunillu patittarneqartarluni, ilinniartitsisut takusarpaat qisuariassanatilli.

Niviarsiaqqap allap pinerluuteqarnissaminut pinngitsaalineqartarnini oqaluttuaraa.

- Niviarsiaraq oqaluttuarpoq atuarfimmi pimmatigineqartarluni, tillinnianngikkunilu persuttarneqarnissaminik sioorasaarneqartarluni.

Meeraq alla atuaqatimi ilaanut kinguaassiutitigut atornerlunneqarsimanerminik nassuerutiginnippoq, tamatumali kingorna atuarfimmi meeqqanit arlaqartunit pimmatigineqartalerpoq.

AAMMA ATUARUK Hashi ikiorneqannginnerlu Qeqqata Kommuniani meeqqanut atugarliortitsisut

Meeqqat arlaqartut angajoqqaallu MIO-p nalunaarusiaani oqaluttuaraat meeqqat ilinniartitsisullu pimmatiginninneq pillugu ernumassuteqarlutik saaffiginnikkaangamik ilinniartitsisut soqutaanngitsumik pissuseqanngikkaangamik ilasseraanngitsumik oqaaseqaannartartut.

Kommunip atuarfiillu pimmatiginnittoqarneranut sakkortuumut iliuuseqaqquneqarput.

- Inersimasut akisussaaffigaat pimmatiginnittoqarnerani akuliunnissaq aamma meeqqat imminnut pimmatigisarnerini erseqqissumik periusissaqarnissaq iliuusissanillu pilersaaruteqarnissaq, MIO nalunaarusiaani allassimavoq.

MIO-p sapaatip-akunnerini marlunni tikeraarnerani meeqqat 168-it saaffiginnissuteqarput. Tikeraarnerani 49-t kommunimut nalunaarutigineqarput.

AAMMA ATUARUK MIO-p tikeraarnera Qeqqata Kommunianut 49-nik nalunaaruteqartitsisoq