Isumaginninnermut pisortaq Meeqqanut inatsit iluaqutaassaaq aningaasartornarnerussallunili
Suliassalli naammassineqarsinnaassappata aningaasat amerlanerusut kommunit pisariaqartippaat, Qaasuitsoq Avannarlermi isumaginninnermut pisortaq Henrik Soloy oqarpoq.
- Inatsit nutaaq tunngaviusumik tikilluaqquarput. Ingammik meeqqanut inuusuttunullu tunngasuni unammilligassaqartugut isertugaanngilaq, taavalu ajornartorsiummut aqutsisinnaanissatsinnut sakkussarsinissarput qilanaarpugut, Henrik Soloy oqarpoq.
Inatsisissatut siunnersuummi angajoqqaarsiaasartut aamma meeqqanut ulloq unnuarlu paaqqinnittarfiini nakkutilliisarnerit pitsaanerulissapput, aamma nuna tamakkerlugu nalunaaruteqartarfimmik pilersitsisoqassaaq, Qaasuitsoq Avannarlermilu isumaginninnermut pisortap angajoqqaanngortussanut siusinaartumik iliuuseqartarnissap aallunneruneqarnissaa ajunngitsutut isigaa.
AAMMA ATUARUK Ny børnelov skal gøre det enkelt for kommunerne
Tassalu kommunit angajoqqaanngortussanut tapersersuinissamik inatsisitigut pisussaaffilerneqarnerat tikilluaqquarput, Henrik Soloy oqarpoq.
Inatsisissatut siunnersuummi isumaginnittoqarfinni amerlanerusunik sulisoqalertussaagaluartoq, aningaasanik Namminersorluni Oqartussanit tapiiffigineqartarnissaq isumaginninnermut pisortamit Soloy-mit naatsorsuutigineqarpoq.
Naggataatigut aningaasaqarnermut tunngavoq, taava suliassamik kivitsisinnaaniassagutta amerlanerusunik sulisoqartariaqaratta Namminersorlutik Oqartussat kommuninut aningaasanik tunniussinissaat qilanaaraara
Inatsisissatut siunnersuummi oqaaseqaatigineqartut naapertorlugit suliniutigineqartut nutaat kommunenut ukiumut 25 million kr-nit sinerlugit aningaasartuutaassapput.
AAMMA ATUARUK Meeqqat pillugit inatsisitaassaq nuannaarutigalugulu ernumanartoqartikkaa
Aningaasassarsiuussinnaagaannili suliassanillu naammassinnissinnaasunik sulisussaqaraanni inuiaqatigiinnut siunissami ungasinnerusumi imminut akilersinnaassaaq.
Aningaasanik atuinerunissaq amerlanernillu sulisoqarnissaq aallaqqaammut pisariaqarpoq. Siunissarli ungasinnerusoq eqqarsaatigalugu meeqqat inuusuttullu atugarisaannik pitsanngorsaasussaavoq. Tassalu siunissaq ungasinnerusoq eqqarsaatigalugu akikinnerussaaq, Henrik Soloy oqarpoq.
AAMMA ATUARUK Ulloq unnuarlu paaqqinnittarfinnut inissiisarneq sukateriffigineqalerpoq
Inatsisissatut siunnersuut inatsisartuni sisamanngornermi ualikkut siullermeerlugu oqaluuserineqarmat amerlanerussuteqarluartunit tapersersorneqarpoq.
Siumut, Inuit Ataqatigiit, Demokraatit aamma Partii Naleqqap oqaaseqartartui siunnersuutigineqartumut qilanaarput inatsisartullu ilaqutariinnermut peqqussutsimullu ataatsimiititalaanut ingerlateqqinneqarpoq.
