Kommuneqarfik Sermersooq: Meeqqanik ussassaareriartoqarsimasinnaavoq
- Nuup immikkoortuani Nuussuarmi meeqqat atuareernerminni ornittagaata Juniorklub Qajaasat eqqaani angutit marluk kiinnatik asseqqallugit niviarsiaqqamik biiliminnut qernertumut sapaatip akunnerani kingullermi, tallimanngormat ikeqqusigaluarput. Qujanartumilli niviarsiaraq qimaalluni Qajaasani sulisut oqaluttuuppai qanoq pisoqarsimaneranik, Kommuneqarfik Sermersooq allappoq.
Kommuni naapertorlugu pisoq tallimanngormat pivoq, Nuummi atuarfiit ilaanni Ukaliusami meeqqat atuartut angutinit marlunnit aamma qernertunik biililinnit aningaasanik tunniussiumallutik biiliminnut ikeqqusigaluarneri sapaatip akunneri marluk qaangiutiinnartullu.
- Niviarsiaqqamik tallimanngormat innimilleeriaraluartut angutit marluk taamaalioqqittuunersut uppernarsisinnaanngikkaluarlutigu biiliisa siullermik pisumut assinguneri pissutigalugu pisoq malinnaavigeqqissaarparput. Aamma tallimanngormat pisoq pisumut siullermut assingummat angutit allat taamaaliorsimagaluarpataluunniit tamanna isumakulunnartutut isigaarput, Meeqqanut Atuarfinnullu ingerlatsivimmi pisortaq, Helene Broberg Berthelsen oqarpoq, imalu nangilluni:
- Pisut tujorminartut marluk politiinit ilungesunartutut tiguneqarlutik misissorneqarumaartut neriuutigalugu upperaarput. Meeqqat mianersortarnissaannik angajoqqaanit oqaloqatigineqartarnissaat innersuussutigissavarput, tassami ajunnginnerpaavoq meeqqat arlaleriarlugit pisoq pillugu oqaloqatigigaanni oqarfigalugit inersimasunik ilisarisimanngisaminnik usserneqariaraluarunik naameertarnissaannik, Helene Broberg Berthelsen oqarpoq.
Meeqqat atuarfiini atuareernerullu kingorna ornittakkani tamani meeqqat mianersortarnissaannik sulisunit kaammattorneqartarnissaat aamma innersuussutaavoq.
