Meeqqanik internettikkut usassaarisartut Nunatsinni takornartaanngitsut
Inuit attaveqaqatigiittarfii, soorlu Facebook, Snapchat, Baloon allarpassuillu atugaasupilussuupput, aamma ukiukitsunit.
Ukiukitsunilli inuit attaveqaqatigiittarfiinik atuisunut aarlerinaateqarsinnaavoq. Meeqqanimmi internettikkut ussassaarisartoqarpoq, taakkulu allaqatigiinnerinnaanngitsumik siunertaqartarput.
Inersimasut inuit attaveqaqatigiittarfiini atuisut ukiukitsut attaveqarfiginiarsarisarpaat, tatigeqatigiinnermillu pilersitsiniartarput - meeqqat eqqunngitsuliorfiginissaat kisiat siunertaralugu.
Taama iliortut ”groomerinik” taaneqartarput nunanilu allanisulli aamma nunatsinni naammattuugassaasarput.
Nuup Politiivini piareersimasuutitat pisortaata, Gedion Qvistip, KNR-imut oqaatigaa meeqqanik internettikkut usassaarisartut pillugit politiit ilaanneeriarlutik saaffigineqartartut.
- Inersimasut nittartakkatigut attaveqatigiittarfiit atorlugit eqqunngitsuliornissamik siunertaqarlutik ukiukitsunik attaveqateqarniartarneri pillugit innuttaasunit saaffigineqallattaasarpugut sulianillu aallartitsisarluta, Gedion Qvist KNR-imut taama oqarpoq.
Qvist oqaluttuarpoq suliat taama ittut tassaasinnaasut angutit niviarsiaqqanut ukiukitsunut assinik kanngunartunik nassiussisimasut, assinik killissanik qaangiisunik piumasut imaluunniit ukiukitsunik naapeqateqarniarsarisut.
Groomerit allaasuusaarsinnaasut
Meeqqanik usassaarisartut pinnguartarfiit qimallugit internettimut nuussimapput, tassanilu allaasuusaarlutik - soorlu meeraasuusaarlutik imaluunniit inersimasoq inussiarnersoq - niviarsiaqqat nukappiaqqallu attaveqarfiginiartarpaat. Groomerillu meeqqap attaveqarfiginissaa iluatsikkuniuk killissanik qaangiisunik iliortinniartarpaa.
”Groomerip” sallu uukapaatitsinerlu atorlugit persarisani kinguaassiutitigut atornerlunniartarpai. Naalagaaffiup politiivi Kalaallit Nunaanni Politiit Facebookimi qupperneranni taama allapput.
Politikommissær Flemming Kjærsidep, Naalagaaffiup politiivisa internetikkut pinerluuteqartarneq pillugu immikkoortortaqarfianeersup, angajoqqaat, aanaa aataalu kajumissaarpai meeqqat internettimik atuinerminni isumatusaartumik pissusilersornissaannik ilinniarteqqullugit.
- Meeqqat internettikkut kammaginnikkusuttunut nalinginnaasumik qularinnittuunissaat, assinik inuit allat susassarinngisaannik aningaasanilluunniit nassiusseqqusisunut itigartitsisarnissaat attaveqaqateqarnermillu unitsitsillutik inersimasunut ikioqqusarnissaat pingaaruteqarpoq, Flemming Kjærside taama oqarpoq nangillunilu:
- Aamma pingaaruteqarpoq meeqqanut inuusuttunullu paasitissallugu arlaatigut piumanngisaminnik ilioqquneqarlutik sioorasaarneqarunik kimigiiserfigineqarunilluunniit - imaluunniit nassiussaqartoorsimagunik - ikiorneqarsinnaasut.
Allat susassarinngisaannik, killissamik qaangiisumik imaluunniit paasissutissanik, assinik videonilluunniit, soorlu atisaqarani assinik, nassiussisoorsimagaanni Redbarnetimit siunnersorneqarnissamut ikiorneqarnissamullu periarfissaqarpoq. Asserli allat susassarinngisaat World Wide Webimut pereersimappat peerneqarnissaa tamatigut qulakkeerneqarsinnaaneq-ajorpoq.
AAMMA ATUARUK 74-nik ukiulik meqqat assigininik atisaqanngitsunik pigisaqarsimasutut pineqaatissinneqartoq
AAMMA ATUARUK Arnat kalaallit pornomik nittartakkami saqqummersinneqartut
