Meeqqanik atornerluisartut sakkortunermik pineqaatissinneqartarnissaat Siumup oqallisigitikkusukkaa
Ikiaroornartumillu hashimik atornerluisut meeraanerminni artornartunik misigisaqartarsimasut, kinguaassiutitigullu kannguttaatsuliorfigineqartarsimasut, Jens-Erik Kirkergaardip tikkuarpaa.
Taamaammat meeqqanik kannguttaatsuliortartut sakkortunermik pineqaatissinneqartalernissaat pillugu inuiaqatigiinni oqallisigineqartariaqartoq, Jens-Erik Kirkegaard isumaqarpoq.
Nunani allani meeqqat kinguaassiutitigut kannguttaatsuliornerit akiorniarlugit iliuuserineqartartunut isumassarsiorfigineqarsinnaasut, Jens-Erik Kirkegaard isumaqarpoq, Polenimilu atuuttut immikkut erseqqissarlugu.
Polenimi meeqqanik kannguttaatsuliortartut kemi atorlugu issuerneqartartut, Nunatsinnilu ilaatigut taanna atuutsilernissaanut oqallittoqartariaqartoq, Jens-Erik Kirkegaard isumaqarpoq.
Aamma ukiuni qulit 20-llu akornanni pineqaatissiinissaq taassuma oqallisissatut siunnersuutigaa.
Siumut Inatsisartuni gruppiata ataatsimeereernerani taama oqallissaariniarluni isumassarsisimalluni, Siumut politikkikkut oqaaseqartartua KNR-imut nassuiaavoq.
Gruppi Meeqqat Illersuisuanit oqaloqatigineqarsimavoq, Meeqqallu Illersuisuata Qaasuitsup Kommuniani angalanermini paasisani gruppimut oqaluttuarai. Oqaluttuaalu misigisaqartitsisut, Jens-Erik Kirkegaard oqaluttuarpoq.
- Sakkortuumik iliuuseqartariaqarpugut. Iliuuserisartakkatsinnit allanik iliuuseqartariaqalerpugut, Jens-Erik Kirkegaard oqarpoq.
Meeqqallu kinguaassiutitigut atornerlunneqarsimasut pillugit ukiut 16-it qaangiummata siullermik ataatsimeersuartoqartoq tikkuarlugu.
Ataatsimeersuarneq taanna meeqqat kinguaassiuutitigut atornerlunneqartartut pillugit allerutigineqartoq, oqallisiginissaanut ammaassisoq, taamani isumaginninnermut naalakkersuisoq, Jørgen Wæver Johansen oqarpoq.